husn-e-mah garche ba-hangam-e-kamal achchha hai

husn-e-mah garche ba-hañgām-e-kamāl achchhā hai

us se merā mah-e-ḳhurshīd-jamāl achchhā hai

bosa dete nahīñ aur dil pe hai har lahza nigāh

jī meñ kahte haiñ ki muft aa.e to maal achchhā hai

aur bāzār se le aa.e agar TuuT gayā

sāġhar-e-jam mirā achchhā sifāl achchhā hai

be-talab deñ to mazā us meñ sivā miltā hai

vo gadā jis ko na ho ḳhū-e-savāl achchhā hai

un ke dekhe se jo aa jaatī hai muñh par raunaq

vo samajhte haiñ ki bīmār kā haal achchhā hai

dekhiye paate haiñ 'ushshāq butoñ se kyā faiz

ik barahman ne kahā hai ki ye saal achchhā hai

ham-suḳhan tesha ne farhād ko shīrīñ se kiyā

jis tarah kā ki kisī meñ ho kamāl achchhā hai

qatra dariyā meñ jo mil jaa.e to dariyā ho jaa.e

kaam achchhā hai vo jis kā ki ma.aal achchhā hai

ḳhizr-sultāñ ko rakhe ḳhāliq-e-akbar sarsabz

shaah ke baaġh meñ ye taaza nihāl achchhā hai

ham ko mā'lūm hai jannat kī haqīqat lekin

dil ke ḳhush rakhne ko 'ġhālib' ye ḳhayāl achchhā hai

husn-e-mah garche ba-hangam-e-kamal achchha hai

us se mera mah-e-KHurshid-jamal achchha hai

bosa dete nahin aur dil pe hai har lahza nigah

ji mein kahte hain ki muft aae to mal achchha hai

aur bazar se le aae agar TuT gaya

saghar-e-jam mera achchha sifal achchha hai

be-talab den to maza us mein siwa milta hai

wo gada jis ko na ho KHu-e-sawal achchha hai

un ke dekhe se jo aa jati hai munh par raunaq

wo samajhte hain ki bimar ka haal achchha hai

dekhiye pate hain 'ushshaq buton se kya faiz

ek barahman ne kaha hai ki ye sal achchha hai

ham-suKHan tesha ne farhad ko shirin se kiya

jis tarah ka ki kisi mein ho kamal achchha hai

qatra dariya mein jo mil jae to dariya ho jae

kaam achchha hai wo jis ka ki maal achchha hai

KHizr-sultan ko rakhe KHaliq-e-akbar sarsabz

shah ke bagh mein ye taza nihaal achchha hai

hum ko ma'lum hai jannat ki haqiqat lekin

dil ke KHush rakhne ko 'ghaalib' ye KHayal achchha hai