husn-e-mutlaq ka azal ke din se main diwana tha

husn-e-mutlaq kā azal ke din se maiñ dīvāna thā

lā-makāñ kahte haiñ jis ko vo mirā kāshāna thā

be-ta.alluq kyā hameñ us ke tasavvur ne kiyā

jab jhukāyā sar-garebāñ apnā ḳhalvat-ḳhāna thā

bāġh-e-a.alam kā tamāshā bā.is-e-ġhaflat huā

dekhnā āñkhoñ kā kānoñ ke liye afsāna thā

shukr sad shukr is hasīñ ke nuur se raushan hai dil

sham.a-e-ruḳh par jis ke jibraīl-e-amīñ parvānā thā

is qadar us ke tasavvur ne satāyā hai mujhe

shu.bha hotā hai ki hastī meñ kabhī thā yā na thā

kyā huā inkār gar isrār muusā par huā

ye kamāl-e-shauq thā vo nāz-e-ma.ashūqāna thā

gul sarāpā gosh bante kyuuñ na sunñe ke liye

chahchahe bulbul ke gulshan meñ tirā afsāna thā

daar par chaḌh kar anal-haq jo kahā mansūr ne

vo bhī ik terā karishma himmat-e-mardāna thā

ham ġhalat-fahmī se samjhe qatl karne ko itaab

aur vahāñ ik chheḌ thī ik nāz-e-ma.ashūqāna thā

sun liye do harf jis ne ho gayā sarmast-e-ishq

chashm-e-afsūñ-sāz kā afsūñ mirā afsāna thā

va.az kī majlis meñ bhī aa.e to yuuñ mastān-e-ishq

mai kī botal thī baġhal meñ haath meñ paimāna thā

jamghaTe lailā-vashoñ ke dekhne se shahar meñ

jā ke jañgal meñ basā majnūñ baḌā dīvāna thā

vasl hotā kis tarah ḳhalvat kahāñ thī raat ko

phuul the nargis ke rakkhe sham.a thī parvāna thā

mazra'-e-a.alam meñ mujh sā soḳhta-qismat kahāñ

jal gayā qismat kā merī khet meñ jo daana thā

dair kī tahqīr kar itnī na ai shaiḳh-e-haram

aaj ka.aba ban gayā kal tak yahī but-ḳhānā thā

aazmā dekhā use sau baar ham ne ai 'amīr'

āshnā se āshnā begāne se begāna thā

husn-e-mutlaq ka azal ke din se main diwana tha

la-makan kahte hain jis ko wo mera kashana tha

be-talluq kya hamein us ke tasawwur ne kiya

jab jhukaya sar-gareban apna KHalwat-KHana tha

bagh-e-alam ka tamasha bais-e-ghaflat hua

dekhna aankhon ka kanon ke liye afsana tha

shukr sad shukr is hasin ke nur se raushan hai dil

shama-e-ruKH par jis ke jibrail-e-amin parwana tha

is qadar us ke tasawwur ne sataya hai mujhe

shubha hota hai ki hasti mein kabhi tha ya na tha

kya hua inkar gar israr musa par hua

ye kamal-e-shauq tha wo naz-e-mashuqana tha

gul sarapa gosh bante kyun na sunne ke liye

chahchahe bulbul ke gulshan mein tera afsana tha

dar par chaDh kar anal-haq jo kaha mansur ne

wo bhi ek tera karishma himmat-e-mardana tha

hum ghalat-fahmi se samjhe qatl karne ko itab

aur wahan ek chheD thi ek naz-e-mashuqana tha

sun liye do harf jis ne ho gaya sarmast-e-ishq

chashm-e-afsun-saz ka afsun mera afsana tha

waz ki majlis mein bhi aae to yun mastan-e-ishq

mai ki botal thi baghal mein hath mein paimana tha

jamghaTe laila-washon ke dekhne se shahar mein

ja ke jangal mein basa majnun baDa diwana tha

wasl hota kis tarah KHalwat kahan thi raat ko

phul the nargis ke rakkhe shama thi parwana tha

mazra'-e-alam mein mujh sa soKHta-qismat kahan

jal gaya qismat ka meri khet mein jo dana tha

dair ki tahqir kar itni na ai shaiKH-e-haram

aaj kaba ban gaya kal tak yahi but-KHana tha

aazma dekha use sau bar hum ne ai 'amir'

aashna se aashna begane se begana tha