husn ghamze ki kashakash se chhuTa mere baad

husn ġhamze kī kashākash se chhuTā mere baa'd

baare ārām se haiñ ahl-e-jafā mere baa'd

mansab-e-sheftagī ke koī qābil na rahā

huī māzūli-e-andāz-o-adā mere baa'd

sham.a bujhtī hai to us meñ se dhuāñ uThtā hai

sho’la-e-’ishq siyah-posh huā mere baa'd

ḳhuuñ hai dil ḳhaak meñ ahvāl-e-butāñ par yā'nī

un ke nāḳhun hue mohatāj-e-hinā mere baa'd

dar-ḳhur-e-’arz nahīñ jauhar-e-bedād ko jā

nigah-e-nāz hai surme se ḳhafā mere baa'd

hai junūñ ahl-e-junūñ ke liye āġhosh-e-vidā.a

chaak hotā hai garebāñ se judā mere baa'd

kaun hotā hai harīf-e-mai-e-mard-afgan-e-’ishq

hai mukarrar lab-e-sāqī pe silā mere baa'd

ġham se martā huuñ ki itnā nahīñ duniyā meñ koī

ki kare tā’zīyat-e-mehr-o-vafā mere baa'd

aa.e hai bekasī-e-ishq pe ronā 'ġhālib'

kis ke ghar jā.egā sailāb-e-balā mere baa'd

thī nigah merī nihāñ-ḳhāna-e-dil kī naqqāb

be-ḳhatar jiite haiñ arbāb-e-riyā mere baa'd

thā maiñ guldasta-e-ahbāb kī bandish kī giyāh

mutafarriq hue mere rufaqā mere baa'd

husn ghamze ki kashakash se chhuTa mere ba'd

bare aaram se hain ahl-e-jafa mere ba'd

mansab-e-sheftagi ke koi qabil na raha

hui mazuli-e-andaz-o-ada mere ba'd

shama bujhti hai to us mein se dhuan uThta hai

sho’la-e-’ishq siyah-posh hua mere ba'd

KHun hai dil KHak mein ahwal-e-butan par ya'ni

un ke naKHun hue mohataj-e-hina mere ba'd

dar-KHur-e-’arz nahin jauhar-e-bedad ko ja

nigah-e-naz hai surme se KHafa mere ba'd

hai junun ahl-e-junun ke liye aaghosh-e-widaa

chaak hota hai gareban se juda mere ba'd

kaun hota hai harif-e-mai-e-mard-afgan-e-’ishq

hai mukarrar lab-e-saqi pe sila mere ba'd

gham se marta hun ki itna nahin duniya mein koi

ki kare ta’ziyat-e-mehr-o-wafa mere ba'd

aae hai bekasi-e-ishq pe rona 'ghaalib'

kis ke ghar jaega sailab-e-bala mere ba'd

thi nigah meri nihan-KHana-e-dil ki naqqab

be-KHatar jite hain arbab-e-riya mere ba'd

tha main guldasta-e-ahbab ki bandish ki giyah

mutafarriq hue mere rufaqa mere ba'd