ibn-e-mariyam hua kare koi

ibn-e-mariyam huā kare koī

mere dukh kī davā kare koī

shar’-o-ā.īn par madār sahī

aise qātil kā kyā kare koī

chaal jaise kaḌī kamān kā tiir

dil meñ aise ke jā kare koī

baat par vaañ zabān kaTtī hai

vo kaheñ aur sunā kare koī

bak rahā huuñ junūñ meñ kyā kyā kuchh

kuchh na samjhe ḳhudā kare koī

na suno gar burā kahe koī

na kaho gar burā kare koī

rok lo gar ġhalat chale koī

baḳhsh do gar ḳhatā kare koī

kaun hai jo nahīñ hai hājat-mand

kis kī hājat-ravā kare koī

kyā kiyā ḳhizr ne sikandar se

ab kise rahnumā kare koī

jab tavaqqo' hī uTh ga.ī 'ġhālib'

kyuuñ kisī kā gila kare koī

ibn-e-mariyam hua kare koi

mere dukh ki dawa kare koi

shar’-o-ain par madar sahi

aise qatil ka kya kare koi

chaal jaise kaDi kaman ka tir

dil mein aise ke ja kare koi

baat par wan zaban kaTti hai

wo kahen aur suna kare koi

bak raha hun junun mein kya kya kuchh

kuchh na samjhe KHuda kare koi

na suno gar bura kahe koi

na kaho gar bura kare koi

rok lo gar ghalat chale koi

baKHsh do gar KHata kare koi

kaun hai jo nahin hai hajat-mand

kis ki hajat-rawa kare koi

kya kiya KHizr ne sikandar se

ab kise rahnuma kare koi

jab tawaqqo' hi uTh gai 'ghaalib'

kyun kisi ka gila kare koi