ek lafz-e-mohabbat ka adna ye fasana hai

ik lafz-e-mohabbat kā adnā ye fasānā hai

simTe to dil āshiq phaile to zamānā hai

ye kis kā tasavvur hai ye kis kā fasānā hai

jo ashk hai āñkhoñ meñ tasbīh kā daanā hai

dil sañg-e-malāmat kā har-chand nishānā hai

dil phir bhī mirā dil hai dil hī to zamānā hai

ham ishq ke māroñ kā itnā hī fasānā hai

rone ko nahīñ koī hañsne ko zamānā hai

vo aur vafā-dushman māneñge na maanā hai

sab dil kī sharārat hai āñkhoñ kā bahānā hai

shā.ir huuñ maiñ shā.ir huuñ merā hī zamānā hai

fitrat mirā ā.īna qudrat mirā shānā hai

jo un par guzartī hai kis ne ise jaanā hai

apnī hī musībat hai apnā hī fasānā hai

kyā husn ne samjhā hai kyā ishaq ne jaanā hai

ham ḳhāk-nashīnoñ kī Thokar meñ zamānā hai

āġhāz-e-mohabbat hai aanā hai na jaanā hai

ashkoñ kī hukūmat hai aahoñ kā zamānā hai

āñkhoñ meñ namī sī hai chup-chup se vo baiThī haiñ

nāzuk sī nigāhoñ meñ nāzuk sā fasānā hai

ham dard-ba-dil nālāñ vo dast-ba-dil hairāñ

ai ishq to kyā zālim terā hī zamānā hai

yā vo thī ḳhafā ham se yā ham haiñ ḳhafā un se

kal un kā zamāna thā aaj apnā zamānā hai

ai ishq-e-junūñ-pesha haañ ishq-e-junūñ-pesha

aaj ek sitamgar ko hañs-hañs ke rulānā hai

ye ishq nahīñ āsāñ itnā hī samajh liije

ik aag kā dariyā hai aur Duub ke jaanā hai

ḳhud husn-o-shabāb un kā kyā kam hai raqīb apnā

jab dekhiye ab vo haiñ ā.īna hai shānā hai

ham ishq-e-mujassam haiñ lab tishna-o-mustafī

dariyā ko talab kaisī dariyā ko rulānā hai

tasvīr ke do ruḳh haiñ jaañ aur ġham-e-jānāñ

ik naqsh chhupānā hai ik naqsh dikhānā hai

ye husn-o-jamāl un kā ye ishq-o-shabāb apnā

jiine kī tamannā hai marne kā zamānā hai

mujh ko isī dhun meñ hai har-lahza sabar karnā

ab aa.e vo ab aa.e lāzim unheñ aanā hai

ḳhuddārī-o-mahrūmī mahrūmī-o-ḳhuddārī

ab dil ko ḳhudā rakhe ab dil kā zamānā hai

ashkoñ ke tabassum meñ aahoñ ke tarannum meñ

ma.asūm mohabbat kā ma.asūm fasānā hai

aañsū to bahut se haiñ āñkhoñ meñ 'jigar' lekin

bañdh jaa.e so motī hai rah jaa.e so daanā hai

ek lafz-e-mohabbat ka adna ye fasana hai

simTe to dil aashiq phaile to zamana hai

ye kis ka tasawwur hai ye kis ka fasana hai

jo ashk hai aankhon mein tasbih ka dana hai

dil sang-e-malamat ka har-chand nishana hai

dil phir bhi mera dil hai dil hi to zamana hai

hum ishq ke maron ka itna hi fasana hai

rone ko nahin koi hansne ko zamana hai

wo aur wafa-dushman manenge na mana hai

sab dil ki shararat hai aankhon ka bahana hai

shair hun main shair hun mera hi zamana hai

fitrat mera aaina qudrat mera shana hai

jo un par guzarti hai kis ne ise jaana hai

apni hi musibat hai apna hi fasana hai

kya husn ne samjha hai kya ishaq ne jaana hai

hum KHak-nashinon ki Thokar mein zamana hai

aaghaz-e-mohabbat hai aana hai na jaana hai

ashkon ki hukumat hai aahon ka zamana hai

aankhon mein nami si hai chup-chup se wo baiThi hain

nazuk si nigahon mein nazuk sa fasana hai

hum dard-ba-dil nalan wo dast-ba-dil hairan

ai ishq to kya zalim tera hi zamana hai

ya wo thi KHafa hum se ya hum hain KHafa un se

kal un ka zamana tha aaj apna zamana hai

ai ishq-e-junun-pesha han ishq-e-junun-pesha

aaj ek sitamgar ko hans-hans ke rulana hai

ye ishq nahin aasan itna hi samajh lije

ek aag ka dariya hai aur Dub ke jaana hai

KHud husn-o-shabab un ka kya kam hai raqib apna

jab dekhiye ab wo hain aaina hai shana hai

hum ishq-e-mujassam hain lab tishna-o-mustafi

dariya ko talab kaisi dariya ko rulana hai

taswir ke do ruKH hain jaan aur gham-e-jaanan

ek naqsh chhupana hai ek naqsh dikhana hai

ye husn-o-jamal un ka ye ishq-o-shabab apna

jine ki tamanna hai marne ka zamana hai

mujh ko isi dhun mein hai har-lahza sabar karna

ab aae wo ab aae lazim unhen aana hai

KHuddari-o-mahrumi mahrumi-o-KHuddari

ab dil ko KHuda rakhe ab dil ka zamana hai

ashkon ke tabassum mein aahon ke tarannum mein

masum mohabbat ka masum fasana hai

aansu to bahut se hain aankhon mein 'jigar' lekin

bandh jae so moti hai rah jae so dana hai