ishq mein tere koh-e-gham sar pe liya jo ho so ho

ishq meñ tere koh-e-ġham sar pe liyā jo ho so ho

aish-o-nishāt-e-zindagī chhoḌ diyā jo ho so ho

pūchho na mujh ḳharāb se yaaro salāh-e-kār tum

apne to ab rahe nahīñ hosh-ba-jā jo ho so ho

muj-se marīz ko tabīb haath apnā mat lagā

us ko ḳhudā pe chhoḌ do bahr-e-ḳhudā jo ho so ho

aql ke madrasa se uTh ishq ke mai-kada meñ aa

jām-e-fanā-o-be-ḳhudī ab to piyā jo ho so ho

laag kī aag lag uThī pamba namat sā jal gayā

raḳht-e-vajūd-e-jān-o-tan kuchh na bachā jo ho so ho

dīda-o-dil baham haiñ ek suujh meñ aur buujh meñ

āñkhoñ ke sāmne ayaañ dil meñ basā jo ho so ho

hijr kī jo musībateñ arz kiiñ us ke sāmne

nāz-o-adā se muskurā kahne lagā jo ho so ho

hastī kī is sarā.e meñ raat kī raat jo bas liye

sub.h-e-adam huī na ho va paañv uThāo jo ho so ho

duniyā ke nek-o-bad se kaam ham ko 'niyāz' kuchh nahīñ

aap se guzar gayā phir use kyā jo ho so ho

ishq mein tere koh-e-gham sar pe liya jo ho so ho

aish-o-nishat-e-zindagi chhoD diya jo ho so ho

puchho na mujh KHarab se yaro salah-e-kar tum

apne to ab rahe nahin hosh-ba-ja jo ho so ho

muj-se mariz ko tabib hath apna mat laga

us ko KHuda pe chhoD do bahr-e-KHuda jo ho so ho

aql ke madrasa se uTh ishq ke mai-kada mein aa

jam-e-fana-o-be-KHudi ab to piya jo ho so ho

lag ki aag lag uThi pamba namat sa jal gaya

raKHt-e-wajud-e-jaan-o-tan kuchh na bacha jo ho so ho

dida-o-dil baham hain ek sujh mein aur bujh mein

aankhon ke samne ayan dil mein basa jo ho so ho

hijr ki jo musibaten arz kin us ke samne

naz-o-ada se muskura kahne laga jo ho so ho

hasti ki is sarae mein raat ki raat jo bas liye

subh-e-adam hui na ho wa panw uThao jo ho so ho

duniya ke nek-o-bad se kaam hum ko 'niyaz' kuchh nahin

aap se guzar gaya phir use kya jo ho so ho