ishq mein tere koh-e-gham sar pe liya jo ho so ho

ishq meñ tere koh-e-ġham sar pe liyā jo ho so ho

aish-o-nishāt-e-zindagī chhoḌ diyā jo ho so ho

pūchho na mujh ḳharāb se yaaro salāhkār tum

apne to ab nahīñ rahe hosh-bajā jo ho so ho

mujh se marīz ko tabīb haath tū apnā mat lagā

is ko ḳhudā pe chhoḌ de bahar-e-ḳhudā jo ho so ho

aqal ke madrasa se uTh ishq ke mai-kada meñ aa

jām-e-fanā-o-be-ḳhudī ab to piyā jo ho so ho

laag kī aag lagte hī pamba namat ye jal gayā

raḳht-e-vajūd-e-jān-o-tan kuchh na bachā jo ho so ho

dīda-o-dil ba-ham haiñ ek suujh meñ aur buujh meñ

āñkhoñ ke sāmne ayaañ dil meñ basā jo ho so ho

hijr kī jo musībateñ arz kiiñ us ke rū-ba-rū

nāz-o-adā se muskurā kahne lagā jo ho so ho

hastī ke is sarāb meñ raat kī raat bas rahe

sub.h-e-adam huī namūd paañv uThā jo ho so ho

duniyā ke nek-o-bad se kaam ham ko 'niyāz' kuchh nahīñ

aap se jo guzar gayā phir use kyā jo ho so ho

ishq mein tere koh-e-gham sar pe liya jo ho so ho

aish-o-nishat-e-zindagi chhoD diya jo ho so ho

puchho na mujh KHarab se yaro salahkar tum

apne to ab nahin rahe hosh-baja jo ho so ho

mujh se mariz ko tabib hath tu apna mat laga

is ko KHuda pe chhoD de bahar-e-KHuda jo ho so ho

aqal ke madrasa se uTh ishq ke mai-kada mein aa

jam-e-fana-o-be-KHudi ab to piya jo ho so ho

lag ki aag lagte hi pamba namat ye jal gaya

raKHt-e-wajud-e-jaan-o-tan kuchh na bacha jo ho so ho

dida-o-dil ba-ham hain ek sujh mein aur bujh mein

aankhon ke samne ayan dil mein basa jo ho so ho

hijr ki jo musibaten arz kin us ke ru-ba-ru

naz-o-ada se muskura kahne laga jo ho so ho

hasti ke is sarab mein raat ki raat bas rahe

subh-e-adam hui namud panw uTha jo ho so ho

duniya ke nek-o-bad se kaam hum ko 'niyaz' kuchh nahin

aap se jo guzar gaya phir use kya jo ho so ho