’ishrat-e-qatra hai dariya mein fana ho jaana

’ishrat-e-qatra hai dariyā meñ fanā ho jaanā

dard kā had se guzarnā hai davā ho jaanā

tujh se qismat meñ mirī sūrat-e-qufl-e-abjad

thā likhā baat ke bante hī judā ho jaanā

dil huā kasmakash-e-chāra-e-zehmat meñ tamām

miT gayā ghisne meñ is 'uqde kā vā ho jaanā

ab jafā se bhī haiñ mahrūm ham allah-allāh

is qadar dushman-e-arbāb-e-vafā ho jaanā

zo'f se girya mubaddal ba-dam-e-sard huā

bāvar aayā hameñ paanī kā havā ho jaanā

dil se miTnā tirī añgusht-e-hinā.ī kā ḳhayāl

ho gayā gosht se nāḳhun kā judā ho jaanā

hai mujhe abr-e-bahārī kā baras kar khulnā

rote-rote ġham-e-furqat meñ fanā ho jaanā

gar nahīñ nik.hat-e-gul ko tire kūche kī havas

kyuuñ hai gard-e-rah-e-jaulān-e-sabā ho jaanā

baḳhshe hai jalva-e-gul zauq-e-tamāshā 'ġhālib'

chashm ko chāhiye har rañg meñ vā ho jaanā

tā ki tujh par khule ejāz-e-havā-e-saiqal

dekh barsāt meñ sabz aa.ine kā ho jaanā

’ishrat-e-qatra hai dariya mein fana ho jaana

dard ka had se guzarna hai dawa ho jaana

tujh se qismat mein meri surat-e-qufl-e-abjad

tha likha baat ke bante hi juda ho jaana

dil hua kasmakash-e-chaara-e-zehmat mein tamam

miT gaya ghisne mein is 'uqde ka wa ho jaana

ab jafa se bhi hain mahrum hum allah-allah

is qadar dushman-e-arbab-e-wafa ho jaana

zo'f se girya mubaddal ba-dam-e-sard hua

bawar aaya hamein pani ka hawa ho jaana

dil se miTna teri angusht-e-hinai ka KHayal

ho gaya gosht se naKHun ka juda ho jaana

hai mujhe abr-e-bahaari ka baras kar khulna

rote-rote gham-e-furqat mein fana ho jaana

gar nahin nikhat-e-gul ko tere kuche ki hawas

kyun hai gard-e-rah-e-jaulan-e-saba ho jaana

baKHshe hai jalwa-e-gul zauq-e-tamasha 'ghaalib'

chashm ko chahiye har rang mein wa ho jaana

ta ki tujh par khule ejaz-e-hawa-e-saiqal

dekh barsat mein sabz aaine ka ho jaana