jab tak dahān-e-zaḳhm na paidā kare koī

jab tak dahān-e-zaḳhm na paidā kare koī

mushkil ki tujh se rāh-e-suḳhan vā kare koī

aalam ġhubār-e-vahshat-e-majnūñ hai sar-ba-sar

kab tak ḳhayāl-e-turra-e-lailā kare koī

afsurdagī nahīñ tarab-inshā-e-iltifāt

haañ dard ban ke dil meñ magar jā kare koī

rone se ai nadīm malāmat na kar mujhe

āḳhir kabhī to uqda-e-dil vā kare koī

chāk-e-jigar se jab rah-e-pursish na vā huī

kyā fā.eda ki jaib ko rusvā kare koī

laḳht-e-jigar se hai rag-e-har-ḳhār shāḳh-e-gul

tā chand bāġh-bāni-e-sahrā kare koī

nākāmi-e-nigāh hai barq-e-nazārā-soz

tū vo nahīñ ki tujh ko tamāshā kare koī

har sañg o ḳhisht hai sadaf-e-gauhar-e-shikast

nuqsāñ nahīñ junūñ se jo saudā kare koī

sar bar huī na vāda-e-sabr-āzmā se umr

fursat kahāñ ki terī tamannā kare koī

hai vahshat-e-tabī.at-e-ījād yās-ḳhez

ye dard vo nahīñ ki na paidā kare koī

bekāri-e-junūñ ko hai sar pīTne kā shuġhl

jab haath TuuT jaa.eñ to phir kyā kare koī

husn-e-faroġh-e-shamma-e-suḳhan duur hai 'asad'

pahle Dil-e-gudāḳhta paidā kare koī

vahshat kahāñ ki be-ḳhudī inshā kare koī

hastī ko lafz-e-m.ani-e-anqā kare koī

jo kuchh hai mahv-e-shoḳhi-e-abrū-e-yār hai

āñkhoñ ko rakh ke taaq pe dekhā kare koī

arz-e-sarishk par hai fazā-e-zamāna tañg

sahrā kahāñ ki dāvat-e-dariyā kare koī

vo shoḳh apne husn pe maġhrūr hai 'asad'

dikhlā ke us ko aa.ina toḌā kare koī

jab tak dahān-e-zaḳhm na paidā kare koī

mushkil ki tujh se rāh-e-suḳhan wā kare koī

aalam ġhubār-e-wahshat-e-majnūñ hai sar-ba-sar

kab tak ḳhayāl-e-turra-e-lailā kare koī

afsurdagī nahīñ tarab-inshā-e-iltifāt

hañ dard ban ke dil meñ magar jā kare koī

rone se ai nadīm malāmat na kar mujhe

āḳhir kabhī to uqda-e-dil wā kare koī

chāk-e-jigar se jab rah-e-pursish na wā huī

kyā fāeda ki jaib ko ruswā kare koī

laḳht-e-jigar se hai rag-e-har-ḳhār shāḳh-e-gul

tā chand bāġh-bāni-e-sahrā kare koī

nākāmi-e-nigāh hai barq-e-nazārā-soz

tū wo nahīñ ki tujh ko tamāshā kare koī

har sañg o ḳhisht hai sadaf-e-gauhar-e-shikast

nuqsāñ nahīñ junūñ se jo saudā kare koī

sar bar huī na wāda-e-sabr-āzmā se umr

fursat kahāñ ki terī tamannā kare koī

hai wahshat-e-tabīat-e-ījād yās-ḳhez

ye dard wo nahīñ ki na paidā kare koī

bekāri-e-junūñ ko hai sar pīTne kā shuġhl

jab hath TuT jaeñ to phir kyā kare koī

husn-e-faroġh-e-shamma-e-suḳhan dur hai 'asad'

pahle Dil-e-gudāḳhta paidā kare koī

wahshat kahāñ ki be-ḳhudī inshā kare koī

hastī ko lafz-e-mani-e-anqā kare koī

jo kuchh hai mahw-e-shoḳhi-e-abrū-e-yār hai

āñkhoñ ko rakh ke taq pe dekhā kare koī

arz-e-sarishk par hai fazā-e-zamāna tañg

sahrā kahāñ ki dāwat-e-dariyā kare koī

wo shoḳh apne husn pe maġhrūr hai 'asad'

dikhlā ke us ko aaina toḌā kare koī