jab yaad kiya usne phir kis ki faramoshi

jab yaad kiyā us ne phir kis kī farāmoshī

yuuñ aate haiñ hosh 'akbar' yuuñ jaatī hai be-hoshī

baiThe hue āñkhoñ meñ ḳhud mahv-e-tamāshā ho

dekhā karo tum ham ko ham dekheñ to rūposhī

vo turbat-e-āshiq par muñh Dhāñp kar aa.e haiñ

allāh re sharm un kī allāh re rū-poshī

sunte haiñ ki thā pahle dariyā meñ nihāñ qatrā

ab bahr ne chāhī hai qatre se ham-āġhoshī

mahshar bhī huā barpā uTThe na tire kushte

behosh hai naam us kā allāh re be-hoshī

bhūlegā na ai 'akbar' ustād kā ye misra.a

saaqī diye jā sāġhar jab tak na ho be-hoshī

jab yaad kiya us ne phir kis ki faramoshi

yun aate hain hosh 'akbar' yun jati hai be-hoshi

baiThe hue aankhon mein KHud mahw-e-tamasha ho

dekha karo tum hum ko hum dekhen to ruposhi

wo turbat-e-ashiq par munh Dhanp kar aae hain

allah re sharm un ki allah re ru-poshi

sunte hain ki tha pahle dariya mein nihan qatra

ab bahr ne chahi hai qatre se ham-aghoshi

mahshar bhi hua barpa uTThe na tere kushte

behosh hai nam us ka allah re be-hoshi

bhulega na ai 'akbar' ustad ka ye misra

saqi diye ja saghar jab tak na ho be-hoshi