jahan mein jahan jis ko hum dekhte hain

jahāñ meñ jahāñ jis ko ham dekhte haiñ

tumhīñ ko tumhārī qasam dekhte haiñ

talab-gār tere ba-chashm-e-haqīqat

tamāshā-e-dair-o-haram dekhte haiñ

barābar haiñ gabro-musalmān ham ko

ziyāda kisī ko na kam dekhte haiñ

tere āshiqoñ ko na dozaḳh kā Dar hai

na hasrat se sū-e-iram dekhte haiñ

tabīboñ ne samjhā hai kyā ye tamāsha

merī nabz kyuuñ dam-ba-dam dekhte haiñ

nahīñ band hai bāb-e-ehsān 'vāris'

ham un kā barābar karam dekhte haiñ

laḌī hai kisī gul se kyā aañkh 'aughaT'

tumheñ muztar-o-chashm-e-nam dekhte haiñ

jahan mein jahan jis ko hum dekhte hain

tumhin ko tumhaari qasam dekhte hain

talab-gar tere ba-chashm-e-haqiqat

tamasha-e-dair-o-haram dekhte hain

barabar hain gabro-musalman hum ko

ziyaada kisi ko na kam dekhte hain

tere aashiqon ko na dozaKH ka Dar hai

na hasrat se su-e-iram dekhte hain

tabibon ne samjha hai kya ye tamasha

meri nabz kyun dam-ba-dam dekhte hain

nahin band hai bab-e-ehsan 'waris'

hum un ka barabar karam dekhte hain

laDi hai kisi gul se kya aankh 'aughaT'

tumhein muztar-o-chashm-e-nam dekhte hain