jaur se baz aae par baz aaen kya

jaur se baaz aa.e par baaz aa.eñ kyā

kahte haiñ ham tujh ko muñh dikhlā.eñ kyā

raat din gardish meñ haiñ saat āsmāñ

ho rahegā kuchh na kuchh ghabrā.eñ kyā

laag ho to us ko ham samjheñ lagāv

jab na ho kuchh bhī to dhokā khā.eñ kyā

ho liye kyuuñ nāma-bar ke sāth-sāth

yā-rab apne ḳhat ko ham pahuñchā.eñ kyā

mauj-e-ḳhūñ sar se guzar hī kyuuñ na jaa.e

āstān-e-yār se uTh jaa.eñ kyā

'umr-bhar dekhā kiyā marne kī raah

mar ga.e par dekhiye dikhlā.eñ kyā

pūchhte haiñ vo ki 'ġhālib' kaun hai

koī batlāo ki ham batlā.eñ kyā

jaur se baz aae par baz aaen kya

kahte hain hum tujh ko munh dikhlaen kya

raat din gardish mein hain sat aasman

ho rahega kuchh na kuchh ghabraen kya

lag ho to us ko hum samjhen lagaw

jab na ho kuchh bhi to dhoka khaen kya

ho liye kyun nama-bar ke sath-sath

ya-rab apne KHat ko hum pahunchaen kya

mauj-e-KHun sar se guzar hi kyun na jae

aastan-e-yar se uTh jaen kya

'umr-bhar dekha kiya marne ki rah

mar gae par dekhiye dikhlaen kya

puchhte hain wo ki 'ghaalib' kaun hai

koi batlao ki hum batlaen kya