jalwa-e-husn-e-azal dida-e-biana mujhse

jalva-e-husn-e-azal dīda-e-bianā mujh se

jaane kyā soch ke phir kar liyā parda mujh se

ġham se ehsās kā ā.īna jilā paatā hai

aur ġham sīkhe hai aakar ye salīqa mujh se

raat phir jashn-e-charāġhāñ ke liye māñgā thā

mauj-e-ehsās ne ik pyaas kā sho.ala mujh se

maiñ ne mazlūm kā bas naam liyā thā logo

jaane kyuuñ ho gayā braham vo masīhā mujh se

merī ḳhvāhish pe hai mauqūf vujūd-e-'ālam

aur hai mansūb azal se ye karishma mujh se

dil huuñ maiñ pyaar bharā aur tū nāzuk dhaḌkan

dil kā tujh se hai magar dard kā rishta mujh se

bazm yādoñ kī sajī gosha-e-dil meñ 'jāved'

phir vahī taaza ġhazal kā hai taqāzā mujh se

jalwa-e-husn-e-azal dida-e-biana mujh se

jaane kya soch ke phir kar liya parda mujh se

gham se ehsas ka aaina jila pata hai

aur gham sikhe hai aakar ye saliqa mujh se

raat phir jashn-e-charaghan ke liye manga tha

mauj-e-ehsas ne ek pyas ka shoala mujh se

main ne mazlum ka bas nam liya tha logo

jaane kyun ho gaya braham wo masiha mujh se

meri KHwahish pe hai mauquf wujud-e-'alam

aur hai mansub azal se ye karishma mujh se

dil hun main pyar bhara aur tu nazuk dhaDkan

dil ka tujh se hai magar dard ka rishta mujh se

bazm yaadon ki saji gosha-e-dil mein 'jawed'

phir wahi taza ghazal ka hai taqaza mujh se