ishq la-mahdud jab tak rahnuma hota nahin

'ishq lā-mahdūd jab tak rahnumā hotā nahīñ

zindagī se zindagī kā haq adā hotā nahīñ

be-karāñ hotā nahīñ be-intihā hotā nahīñ

qatra jab tak baḌh ke qulzum-āshnā hotā nahīñ

zindagī ik hādisa hai aur kaisā hādisa

maut se bhī ḳhatm jis kā silsila hotā nahīñ

kaun ye nāseh ko samjhā.e ba-tarz-e-dil-nashīñ

'ishq sādiq ho to ġham bhī be-mazā hotā nahīñ

us maqām-e-qarb tak ab 'ishq pahuñchā hai jahāñ

dīda-o-dil kā bhī aksar vāstā hotā nahīñ

har qadam ke saath manzil lekin is kā kyā 'ilāj

'ishq hī kam-baḳht manzil-āshnā hotā nahīñ

allāh-allāh ye kamāl-e-irtibāt-e-husn-o-’ishq

fāsle hoñ laakh dil se dil judā hotā nahīñ

'ishq la-mahdud jab tak rahnuma hota nahin

zindagi se zindagi ka haq ada hota nahin

be-karan hota nahin be-intiha hota nahin

qatra jab tak baDh ke qulzum-ashna hota nahin

zindagi ek hadisa hai aur kaisa hadisa

maut se bhi KHatm jis ka silsila hota nahin

kaun ye naseh ko samjhae ba-tarz-e-dil-nashin

'ishq sadiq ho to gham bhi be-maza hota nahin

us maqam-e-qarb tak ab 'ishq pahuncha hai jahan

dida-o-dil ka bhi aksar wasta hota nahin

har qadam ke sath manzil lekin is ka kya 'ilaj

'ishq hi kam-baKHt manzil-ashna hota nahin

allah-allah ye kamal-e-irtibaat-e-husn-o-’ishq

fasle hon lakh dil se dil juda hota nahin