jis zaKHm ki ho sakti ho tadbir rafu ki

jis zaḳhm kī ho saktī ho tadbīr rafū kī

likh dījiyo yā rab use qismat meñ 'adū kī

achchhā hai sar-añgusht-e-hinā.ī kā tasavvur

dil meñ nazar aatī to hai ik buuñd lahū kī

kyuuñ Darte ho 'ushshāq kī be-hauslagī se

yaañ to koī suntā nahīñ fariyād kisū kī

dashne ne kabhī muñh na lagāyā ho jigar ko

ḳhanjar ne kabhī baat na pūchhī ho gulū kī

sad-haif vo nākām ki ik 'umr se 'ġhālib'

hasrat meñ rahe ek but-e-arbada-jū kī

go zindagī-e-zāhid-e-be-chāra 'abas hai

itnā hai ki rahtī to hai tadbīr vuzū kī

ab be-ḳhabrāñ mere lab-e-zaḳhm-e-jigar par

baḳhiya jase kahte ho shikāyat hai rafū kī

jis zaKHm ki ho sakti ho tadbir rafu ki

likh dijiyo ya rab use qismat mein 'adu ki

achchha hai sar-angusht-e-hinai ka tasawwur

dil mein nazar aati to hai ek bund lahu ki

kyun Darte ho 'ushshaq ki be-hauslagi se

yan to koi sunta nahin fariyaad kisu ki

dashne ne kabhi munh na lagaya ho jigar ko

KHanjar ne kabhi baat na puchhi ho gulu ki

sad-haif wo nakaam ki ek 'umr se 'ghaalib'

hasrat mein rahe ek but-e-arbada-ju ki

go zindagi-e-zahid-e-be-chaara 'abas hai

itna hai ki rahti to hai tadbir wuzu ki

ab be-KHabran mere lab-e-zaKHm-e-jigar par

baKHiya jase kahte ho shikayat hai rafu ki