jise teri zulfon ke KHam yaad aae

jise terī zulfoñ ke ḳham yaad aa.e

use phir na dair-o-haram yaad aa.e

vahīñ māh-o-anjum kī tābāniyāñ thiiñ

jahāñ tere naqsh-e-qadam yaad aa.e

baḌhī aur shām-e-alam kī udāsī

jo gesū tire dam-badam yaad aa.e

baharhāl un se rahā ik ta.alluq

sitam yaad aa.e karam yaad aa.e

ho jis kī nazar meñ vujūd ek manzil

use kaise rāh-e-adam yaad aa.e

'nasīr' apnī rūdād jab ham ne dekhī

ghanī zulf ke pech-o-ḳham yaad aa.e

jise teri zulfon ke KHam yaad aae

use phir na dair-o-haram yaad aae

wahin mah-o-anjum ki tabaniyan thin

jahan tere naqsh-e-qadam yaad aae

baDhi aur sham-e-alam ki udasi

jo gesu tere dam-badam yaad aae

baharhaal un se raha ek talluq

sitam yaad aae karam yaad aae

ho jis ki nazar mein wujud ek manzil

use kaise rah-e-adam yaad aae

'nasir' apni rudad jab hum ne dekhi

ghani zulf ke pech-o-KHam yaad aae