kabhi neki bhi uske ji mein gar aa jae hai mujhse

kabhī nekī bhī us ke jī meñ gar aa jaa.e hai mujh se

jafā.eñ kar ke apnī yaad sharmā jaa.e hai mujh se

ḳhudāyā jazba-e-dil kī magar tāsīr ulTī hai

ki jitnā khīñchtā huuñ aur khiñchtā jaa.e hai mujh se

vo bad-ḳhū aur merī dāstān-e-ishq tūlānī

'ibārat muḳhtasar qāsid bhī ghabrā jaa.e hai mujh se

udhar vo bad-gumānī hai idhar ye nā-tavānī hai

na pūchhā jaa.e hai us se na bolā jaa.e hai mujh se

sambhalne de mujhe ai nā-ummīdī kyā qayāmat hai

ki dāmān-e-ḳhayāl-e-yār chhūTā jaa.e hai mujh se

takalluf bartaraf nazzārgī meñ bhī sahī lekin

vo dekhā jaa.e kab ye zulm dekhā jaa.e hai mujh se

hue haiñ paañv hī pahle nabard-e-ishq meñ zaḳhmī

na bhāgā jaa.e hai mujh se na Thahrā jaa.e hai mujh se

qayāmat hai ki hove mudda'ī kā ham-safar 'ġhālib'

vo kāfir jo ḳhudā ko bhī na sauñpā jaa.e hai mujh se

kabhi neki bhi us ke ji mein gar aa jae hai mujh se

jafaen kar ke apni yaad sharma jae hai mujh se

KHudaya jazba-e-dil ki magar tasir ulTi hai

ki jitna khinchta hun aur khinchta jae hai mujh se

wo bad-KHu aur meri dastan-e-ishq tulani

'ibarat muKHtasar qasid bhi ghabra jae hai mujh se

udhar wo bad-gumani hai idhar ye na-tawani hai

na puchha jae hai us se na bola jae hai mujh se

sambhalne de mujhe ai na-ummidi kya qayamat hai

ki daman-e-KHayal-e-yar chhuTa jae hai mujh se

takalluf bartaraf nazzargi mein bhi sahi lekin

wo dekha jae kab ye zulm dekha jae hai mujh se

hue hain panw hi pahle nabard-e-ishq mein zaKHmi

na bhaga jae hai mujh se na Thahra jae hai mujh se

qayamat hai ki howe mudda'i ka ham-safar 'ghaalib'

wo kafir jo KHuda ko bhi na saunpa jae hai mujh se