kahun jo haal to kahte ho muddaa kahiye

kahūñ jo haal to kahte ho mudda'ā kahiye

tumhīñ kaho ki jo tum yuuñ kaho to kyā kahiye

na kahiyo taa'n se phir tum ki ham sitam-gar haiñ

mujhe to ḳhū hai ki jo kuchh kaho bajā kahiye

vo neshtar sahī par dil meñ jab utar jāvai

nigāh-e-nāz ko phir kyuuñ na āshnā kahiye

nahīñ zarīya-e-rāhat jarāhat-e-paikāñ

vo zaḳhm-e-teġh hai jis ko ki dil-kushā kahiye

jo mudda'ī bane us ke na mudda.ī baniye

jo nā-sazā kahe us ko na nā-sazā kahiye

kahīñ haqīqat-e-jāñ-kāhī-e-maraz likhiye

kahīñ musībat-e-nā-sāzī-e-davā kahiye

kabhī shikāyat-e-ranj-e-girāñ-nashīñ kiije

kabhī hikāyat-e-sabr-e-gurez-pā kahiye

rahe na jaan to qātil ko ḳhūñ-bahā diije

kaTe zabān to ḳhanjar ko marhabā kahiye

nahīñ nigār ko ulfat na ho nigār to hai

ravānī-e-ravish-o-mastī-e-adā kahiye

nahīñ bahār ko fursat na ho bahār to hai

tarāvat-e-chaman-o-kHūbī-e-havā kahiye

safīna jab ki kināre pe aa lagā 'ġhālib'

ḳhudā se kyā sitam-o-jaur-e-nā-ḳhudā kahiye

kahun jo haal to kahte ho mudda'a kahiye

tumhin kaho ki jo tum yun kaho to kya kahiye

na kahiyo ta'n se phir tum ki hum sitam-gar hain

mujhe to KHu hai ki jo kuchh kaho baja kahiye

wo neshtar sahi par dil mein jab utar jawai

nigah-e-naz ko phir kyun na aashna kahiye

nahin zariya-e-rahat jarahat-e-paikan

wo zaKHm-e-tegh hai jis ko ki dil-kusha kahiye

jo mudda'i bane us ke na muddai baniye

jo na-saza kahe us ko na na-saza kahiye

kahin haqiqat-e-jaan-kahi-e-maraz likhiye

kahin musibat-e-na-sazi-e-dawa kahiye

kabhi shikayat-e-ranj-e-giran-nashin kije

kabhi hikayat-e-sabr-e-gurez-pa kahiye

rahe na jaan to qatil ko KHun-baha dije

kaTe zaban to KHanjar ko marhaba kahiye

nahin nigar ko ulfat na ho nigar to hai

rawani-e-rawish-o-masti-e-ada kahiye

nahin bahaar ko fursat na ho bahaar to hai

tarawat-e-chaman-o-kHubi-e-hawa kahiye

safina jab ki kinare pe aa laga 'ghaalib'

KHuda se kya sitam-o-jaur-e-na-KHuda kahiye