kali kali zulfon ke phande na Dalo

bhuul ho jaatī hai yuuñ taish meñ aayā na karo

fāsle ḳhatm karo baat baḌhāyā na karo

ye nigāheñ ye ishāre ye adā.eñ tauba

in sharāboñ ko sar-e-'ām luTāyā na karo

shaam gahrī ho to kuchh aur hasīñ hotī hai

sāya-e-zulf ko chehre se haTāyā na karo

kaalī kaalī zulfoñ ke phande na Daalo

hameñ zinda rahne do ai husn vaalo

na chheḌo hameñ ham satā.e hue haiñ

bahut zaḳhm siine pe khaa.e hue haiñ

sitam-gar ho tum ḳhuub pahchānte haiñ

tumhārī adāoñ ko ham jānte haiñ

daġhā-bāz ho tum sitam Dhāne vaale

fareb-e-mohabbat meñ uljhāne vaale

ye rañgīñ kahānī tumhī ko mubārak

tumhārī javānī tumhī ko mubārak

hamārī taraf se nigāheñ haTā lo

kaalī kaalī zulfoñ ke phande na Daalo

hameñ zinda rahne do ai husn vaalo

zanjīr meñ zulfoñ kī phañs jaane ko kyā kahiye

dīvāna merā dil hai dīvāne ko kyā kahiye

sambhālo zarā apnā āñchal gulābī

dikhāo na hañs-hañs ke āñkheñ sharābī

sulūk un kā duniyā meñ achchhā nahīñ hai

hasīnoñ pe ham ko bharosa nahīñ hai

uThāte haiñ nazreñ to girtī haiñ bijlī

adā jo bhī niklī qayāmat hī niklī

jahāñ tum ne chehre se āñchal haTāyā

vahīñ ahl-e-dil ko tamāsha banāyā

kaalī kaalī zulfoñ ke phande na Daalo

hameñ zinda rahne do ai husn vaalo

ḳhudā ke liye ham pe Dore na Daalo

hameñ zinda rahne do ai husn vaalo

āvāra huī jaatī hai zulfoñ ko sambhālo

dil merā ulajh jā.egā ye jaal na Daalo

kaalī kaalī zulfoñ ke phande na Daalo

hameñ zinda rahne do ai husn vaalo

apnī is zulf-e-pareshāñ ko sambhālo varna

aise gustāḳh ko ham chuum liyā karte haiñ

kaalī kaalī zulfoñ ke phande na Daalo

hameñ zinda rahne do ai husn vaalo

uljhā hai paañv yaar kā zulf-e-darāz meñ

lo aap apne daam meñ sayyād aa ga.e

kaalī kaalī zulfoñ ke phande na Daalo

hameñ zinda rahne do ai husn vaalo

sadā vaar karte ho teġh-e-vafā kā

bahāte ho tum ḳhuun ahl-e-vafā kā

ye nāgin sī zulfeñ ye zahrīlī nazreñ

vo paanī na māñge ye jis ko Das le

vo luT jaa.e jo tum se dil ko lagā le

phir hasratoñ kā janāza uThā.e

hai mā'lūm ham ko tumhārī haqīqat

mohabbat ke parde meñ karte ho nafrat

kahīñ aur jā ke adā.eñ uchhālo

kaalī kaalī zulfoñ ke phande na Daalo

hameñ zinda rahne do ai husn vaalo

ye jhūTī numā.ish ye jhūTī banāvaT

fareb-e-nazar hai nazar kī lagāvaT

ye sumbul se gesū ye 'āriz gulābī

zamāne milā.eñge ik din ḳharābī

'fanā' ham ko kar de na ye muskurānā

adā kāfirāna chalan zālimāna

dikhāo na ye ishva-o-nāz ham ko

kisī aur par zulf kā jaal Daalo

sikhāo na ulfat ke andāz ham ko

kaalī kaalī zulfoñ ke phande na Daalo

hameñ zinda rahne do ai husn vaalo

apnī zulfoñ kā parda banā lījiye

husn-e-ma.asūm ab fitna-gar ho gayā

palkeñ gir jā.eñgī Dor jal jā.egā

ruḳh tumhārī nazar kā jidhar ho gayā

kaalī kaalī zulfoñ ke phande na Daalo

hameñ zinda rahne do ai husn vaalo

bhul ho jati hai yun taish mein aaya na karo

fasle KHatm karo baat baDhaya na karo

ye nigahen ye ishaare ye adaen tauba

in sharabon ko sar-e-'am luTaya na karo

sham gahri ho to kuchh aur hasin hoti hai

saya-e-zulf ko chehre se haTaya na karo

kali kali zulfon ke phande na Dalo

hamein zinda rahne do ai husn walo

na chheDo hamein hum satae hue hain

bahut zaKHm sine pe khae hue hain

sitam-gar ho tum KHub pahchante hain

tumhaari adaon ko hum jaante hain

dagha-baz ho tum sitam Dhane wale

fareb-e-mohabbat mein uljhane wale

ye rangin kahani tumhi ko mubarak

tumhaari jawani tumhi ko mubarak

hamari taraf se nigahen haTa lo

kali kali zulfon ke phande na Dalo

hamein zinda rahne do ai husn walo

zanjir mein zulfon ki phans jaane ko kya kahiye

diwana mera dil hai diwane ko kya kahiye

sambhaalo zara apna aanchal gulabi

dikhao na hans-hans ke aankhen sharabi

suluk un ka duniya mein achchha nahin hai

hasinon pe hum ko bharosa nahin hai

uThate hain nazren to girti hain bijli

ada jo bhi nikli qayamat hi nikli

jahan tum ne chehre se aanchal haTaya

wahin ahl-e-dil ko tamasha banaya

kali kali zulfon ke phande na Dalo

hamein zinda rahne do ai husn walo

KHuda ke liye hum pe Dore na Dalo

hamein zinda rahne do ai husn walo

aawara hui jati hai zulfon ko sambhaalo

dil mera ulajh jaega ye jal na Dalo

kali kali zulfon ke phande na Dalo

hamein zinda rahne do ai husn walo

apni is zulf-e-pareshan ko sambhaalo warna

aise gustaKH ko hum chum liya karte hain

kali kali zulfon ke phande na Dalo

hamein zinda rahne do ai husn walo

uljha hai panw yar ka zulf-e-daraaz mein

lo aap apne dam mein sayyaad aa gae

kali kali zulfon ke phande na Dalo

hamein zinda rahne do ai husn walo

sada war karte ho tegh-e-wafa ka

bahate ho tum KHun ahl-e-wafa ka

ye nagin si zulfen ye zahrili nazren

wo pani na mange ye jis ko Das le

wo luT jae jo tum se dil ko laga le

phir hasraton ka janaza uThae

hai ma'lum hum ko tumhaari haqiqat

mohabbat ke parde mein karte ho nafrat

kahin aur ja ke adaen uchhaalo

kali kali zulfon ke phande na Dalo

hamein zinda rahne do ai husn walo

ye jhuTi numaish ye jhuTi banawaT

fareb-e-nazar hai nazar ki lagawaT

ye sumbul se gesu ye 'ariz gulabi

zamane milaenge ek din KHarabi

'fana' hum ko kar de na ye muskurana

ada kafirana chalan zalimana

dikhao na ye ishwa-o-naz hum ko

kisi aur par zulf ka jal Dalo

sikhao na ulfat ke andaz hum ko

kali kali zulfon ke phande na Dalo

hamein zinda rahne do ai husn walo

apni zulfon ka parda bana lijiye

husn-e-masum ab fitna-gar ho gaya

palken gir jaengi Dor jal jaega

ruKH tumhaari nazar ka jidhar ho gaya

kali kali zulfon ke phande na Dalo

hamein zinda rahne do ai husn walo