kam koi fuqara se milta hai KHuda ke waste

kam koī fuqarā se miltā hai ḳhudā ke vāste

daf-e’-a’adā ke liye yā kīmiyā ke vāste

ahl-e-duniyā kī ġharaz lagtī hai jab darvesh se

kahte haiñ apne husūl-e-mudda’ā ke vāste

ai ḳhudā vaalo yahī hai tum se merī iltijā

hal karo mushkil mirī mushkil-kushā ke vāste

mudda'ā hāsil huā to phir ga.e kahne lage

kyuuñ ḳhushāmad kījiye un kī du'ā ke vāste

aise logoñ se kareñ darvesh nā-haq iḳhtilāt

sohbat un kī zahr hai ahl-e-safā ke vāste

shaah jī us ko na kahnā hai vo bhik-mañgā faqīr

aġhniyā se jo mile nashv-o-numā ke vāste

sāyā-e-dargāh-e-kāzim ham ko kyā kam hai 'turāb'

kyuuñ phireñ ham dar-ba-dar zill-e-humā ke vāste

kam koi fuqara se milta hai KHuda ke waste

daf-e’-a’ada ke liye ya kimiya ke waste

ahl-e-duniya ki gharaz lagti hai jab darwesh se

kahte hain apne husul-e-mudda’a ke waste

ai KHuda walo yahi hai tum se meri iltija

hal karo mushkil meri mushkil-kusha ke waste

mudda'a hasil hua to phir gae kahne lage

kyun KHushamad kijiye un ki du'a ke waste

aise logon se karen darwesh na-haq iKHtilat

sohbat un ki zahr hai ahl-e-safa ke waste

shah ji us ko na kahna hai wo bhik-manga faqir

aghniya se jo mile nashw-o-numa ke waste

saya-e-dargah-e-kazim hum ko kya kam hai 'turab'

kyun phiren hum dar-ba-dar zill-e-huma ke waste