kamar bandhe hue chalne ko yan sab yar baiThe hain

kamar bāñdhe hue chalne ko yaañ sab yaar baiThe haiñ

bahut aage ga.e baaqī jo haiñ tayyār baiThe haiñ

na chheḌ ai nik.hat-e-bād-e-bahārī raah lag apnī

tujhe aTkheliyāñ sūjhī haiñ ham be-zār baiThe haiñ

ḳhayāl un kā pare hai 'arsh-e-a'azam se kahīñ saaqī

ġharaz kuchh aur dhun meñ is ghaḌī mai-ḳhvār baiThe haiñ

basān-e-naqsh-e-pā-e-rah-ravāñ kū-e-tamannā meñ

nahīñ uThne kī tāqat kyā kareñ lāchār baiThe haiñ

ye apnī chaal hai uftādgī se in dinoñ pahroñ

nazar aayā jahāñ par sāya-e-dīvār baiThe haiñ

kahīñ haiñ sabr kis ko aah nañg-o-nām hai kyā shai

ġharaz ro piiT kar un sab ko ham yak baar baiThe haiñ

kahīñ bose kī mat jur.at dilā kar baiThiyo un se

abhī is had ko vo kaifī nahīñ hushyār baiThe haiñ

najīboñ kā 'ajab kuchh haal hai is daur meñ yaaro

jise pūchho yahī kahte haiñ ham be-kār baiThe haiñ

na.ī ye vaz.a sharmāne kī sīkhī aaj hai tum ne

hamāre paas sāhab varna yuuñ sau baar baiThe haiñ

kahāñ gardish falak kī chain detī hai sunā 'inshā'

ġhanīmat hai ki ham sūrat yahāñ do-chār baiThe haiñ

kamar bandhe hue chalne ko yan sab yar baiThe hain

bahut aage gae baqi jo hain tayyar baiThe hain

na chheD ai nikhat-e-baad-e-bahaari rah lag apni

tujhe aTkheliyan sujhi hain hum be-zar baiThe hain

KHayal un ka pare hai 'arsh-e-a'azam se kahin saqi

gharaz kuchh aur dhun mein is ghaDi mai-KHwar baiThe hain

basan-e-naqsh-e-pa-e-rah-rawan ku-e-tamanna mein

nahin uThne ki taqat kya karen lachaar baiThe hain

ye apni chaal hai uftadgi se in dinon pahron

nazar aaya jahan par saya-e-diwar baiThe hain

kahin hain sabr kis ko aah nang-o-nam hai kya shai

gharaz ro piT kar un sab ko hum yak bar baiThe hain

kahin bose ki mat jurat dila kar baiThiyo un se

abhi is had ko wo kaifi nahin hushyar baiThe hain

najibon ka 'ajab kuchh haal hai is daur mein yaro

jise puchho yahi kahte hain hum be-kar baiThe hain

nai ye waza sharmane ki sikhi aaj hai tum ne

hamare pas sahab warna yun sau bar baiThe hain

kahan gardish falak ki chain deti hai suna 'insha'

ghanimat hai ki hum surat yahan do-chaar baiThe hain