husn-e-pari ek jalwa-e-mastana hai us ka

husn-e-parī ik jalva-e-mastāna hai us kā

hoshiyār vahī hai jo ki dīvāna hai us kā

vo shoḳh-nihāñ ganj ke mānind hai us meñ

mā'mūra-e-'ālam jo hai vīrāna hai us kā

dil qasr-e-shahanshāh hai vo shoḳh us meñ shahanshāh

'arsa ye do-'ālam kā jilau-ḳhāna hai us kā

yūsuf nahīñ jo haath lage chand diram se

qīmat jo do-'ālam kī hai bai'āna hai us kā

vo yaad hai us kī jo bhalā de do-jahāñ ko

hālat ko kare ġhair vo yārāna hai us kā

āvārgī-e-nikhat-e-gul se hai ishāra

jaame se jo bāhar hai vo dīvāna hai us kā

ye haal huā us ke faqīroñ se huvaidā

ālūda-e-duniyā jo hai be-gāna hai us kā

shukrāna-e-sāqi-e-azal karatā hai 'ātish'

labrez mai-e-shauq se paimāna hai us kā

husn-e-pari ek jalwa-e-mastana hai us ka

hoshiyar wahi hai jo ki diwana hai us ka

wo shoKH-nihan ganj ke manind hai us mein

ma'mura-e-'alam jo hai virana hai us ka

dil qasr-e-shahanshah hai wo shoKH us mein shahanshah

'arsa ye do-'alam ka jilau-KHana hai us ka

yusuf nahin jo hath lage chand diram se

qimat jo do-'alam ki hai bai'ana hai us ka

wo yaad hai us ki jo bhala de do-jahan ko

haalat ko kare ghair wo yarana hai us ka

aawargi-e-nikhat-e-gul se hai ishaara

jame se jo bahar hai wo diwana hai us ka

ye haal hua us ke faqiron se huwaida

aaluda-e-duniya jo hai be-gana hai us ka

shukrana-e-saqi-e-azal karata hai 'atish'

labrez mai-e-shauq se paimana hai us ka