abas mujh par na tegh o bad-guman khinch

'abas mujh par na teġh o bad-gumāñ khīñch

kahā kuchh ho to be-shak le zabāñ khīñch

saf-ārā ho chuke maqtal meñ jāñbāz

kamar se teġh bhar le imtihāñ khīñch

hañsī rone ke o par-nā-tavānī

mujhe lab le chale ashk-e-ravāñ khīñch

kaf-e-pā meñ chubhe ḳhār-e-muġhīlāñ

junūñ ghar se mujhe laayā kahāñ khīñch

phañsā jab dām-e-gesū meñ to bole

musībat jhel ġham khā saḳhtiyāñ khīñch

phaḌak jaa.e tabī'at jis se bahzād

koī tasvīr aisī dilsitāñ khīñch

vo kāhīda hoñ ai 'nāsir' 'ajab kyā

mujhe le jaa.e mor-e-nā-tavāñ khīñch

'abas mujh par na tegh o bad-guman khinch

kaha kuchh ho to be-shak le zaban khinch

saf-ara ho chuke maqtal mein jaanbaz

kamar se tegh bhar le imtihan khinch

hansi rone ke o par-na-tawani

mujhe lab le chale ashk-e-rawan khinch

kaf-e-pa mein chubhe KHar-e-mughilan

junun ghar se mujhe laya kahan khinch

phansa jab dam-e-gesu mein to bole

musibat jhel gham kha saKHtiyan khinch

phaDak jae tabi'at jis se bahzad

koi taswir aisi dilsitan khinch

wo kahida hon ai 'nasir' 'ajab kya

mujhe le jae mor-e-na-tawan khinch