ki wafa humse to ghair isko jafa kahte hain

kī vafā ham se to ġhair is ko jafā kahte haiñ

hotī aa.ī hai ki achchhoñ ko burā kahte haiñ

aaj ham apnī pareshānī-e-ḳhātir un se

kahne jaate to haiñ par dekhiye kyā kahte haiñ

agle vaqtoñ ke haiñ ye log unheñ kuchh na kaho

jo mai-o-naġhma ko andoh-rubā kahte haiñ

dil meñ aa jaa.e hai hotī hai jo fursat ġhash se

aur phir kaun se naale ko rasā kahte haiñ

hai par-e-sarhad-e-idarāk se apnā masjūd

qible ko ahl-e-nazar qibla-numā kahte haiñ

pā-e-afgār pe jab se tujhe rahm aayā hai

ḳhār-e-rah ko tire ham mehr-e-giyā kahte haiñ

ik sharar dil meñ hai us se koī ghabrā.egā kyā

aag matlūb hai ham ko jo havā kahte haiñ

dekhiye laatī hai us shoḳh kī naḳhvat kyā rañg

us kī har baat pe ham nām-e-ḳhudā kahte haiñ

‘vahshat’-o-‘shefta’ ab marsiya kahveñ shāyad

mar gayā 'ġhālib'-e-āshufta-navā kahte haiñ

ki wafa hum se to ghair is ko jafa kahte hain

hoti aai hai ki achchhon ko bura kahte hain

aaj hum apni pareshani-e-KHatir un se

kahne jate to hain par dekhiye kya kahte hain

agle waqton ke hain ye log unhen kuchh na kaho

jo mai-o-naghma ko andoh-ruba kahte hain

dil mein aa jae hai hoti hai jo fursat ghash se

aur phir kaun se nale ko rasa kahte hain

hai par-e-sarhad-e-idarak se apna masjud

qible ko ahl-e-nazar qibla-numa kahte hain

pa-e-afgar pe jab se tujhe rahm aaya hai

KHar-e-rah ko tere hum mehr-e-giya kahte hain

ek sharar dil mein hai us se koi ghabraega kya

aag matlub hai hum ko jo hawa kahte hain

dekhiye lati hai us shoKH ki naKHwat kya rang

us ki har baat pe hum nam-e-KHuda kahte hain

‘wahshat’-o-‘shefta’ ab marsiya kahwen shayad

mar gaya 'ghaalib'-e-ashufta-nawa kahte hain