kisī ko de ke dil koī nawā-sañj-e-fuġhāñ kyuñ ho

kisī ko de ke dil koī navā-sañj-e-fuġhāñ kyuuñ ho

na ho jab dil hī siine meñ to phir muñh meñ zabāñ kyuuñ ho

vo apnī ḳhū na chhoḌeñge ham apnī vaz.a kyuuñ chhoḌeñ

subuk-sar ban ke kyā pūchheñ ki ham se sargirāñ kyuuñ ho

kiyā ġham-ḳhvār ne rusvā lage aag is mohabbat ko

na laave taab jo ġham kī vo merā rāz-dāñ kyuuñ ho

vafā kaisī kahāñ kā ishq jab sar phoḌnā Thahrā

to phir ai sañg-dil terā hī sañg-e-āstāñ kyuuñ ho

qafas meñ mujh se rūdād-e-chaman kahte na Dar hamdam

girī hai jis pe kal bijlī vo merā āshiyāñ kyuuñ ho

ye kah sakte ho ham dil meñ nahīñ haiñ par ye batlāo

ki jab dil meñ tumhīñ tum ho to āñkhoñ se nihāñ kyuuñ ho

ġhalat hai jazb-e-dil kā shikva dekho jurm kis kā hai

na khīñcho gar tum apne ko kashākash darmiyāñ kyuuñ ho

ye fitna aadmī kī ḳhāna-vīrānī ko kyā kam hai

hue tum dost jis ke dushman us kā āsmāñ kyuuñ ho

yahī hai āzmānā to satānā kis ko kahte haiñ

adū ke ho liye jab tum to merā imtihāñ kyuuñ ho

kahā tum ne ki kyuuñ ho ġhair ke milne meñ rusvā.ī

bajā kahte ho sach kahte ho phir kahiyo ki haañ kyuuñ ho

nikālā chāhtā hai kaam kyā ta.anoñ se tū 'ġhālib'

tire be-mehr kahne se vo tujh par mehrbāñ kyuuñ ho

kisī ko de ke dil koī nawā-sañj-e-fuġhāñ kyuñ ho

na ho jab dil hī sine meñ to phir muñh meñ zabāñ kyuñ ho

wo apnī ḳhū na chhoḌeñge hum apnī waza kyuñ chhoḌeñ

subuk-sar ban ke kyā pūchheñ ki hum se sargirāñ kyuñ ho

kiyā ġham-ḳhwār ne ruswā lage aag is mohabbat ko

na lawe tab jo ġham kī wo merā rāz-dāñ kyuñ ho

wafā kaisī kahāñ kā ishq jab sar phoḌnā Thahrā

to phir ai sañg-dil terā hī sañg-e-āstāñ kyuñ ho

qafas meñ mujh se rūdād-e-chaman kahte na Dar hamdam

girī hai jis pe kal bijlī wo merā āshiyāñ kyuñ ho

ye kah sakte ho hum dil meñ nahīñ haiñ par ye batlāo

ki jab dil meñ tumhīñ tum ho to āñkhoñ se nihāñ kyuñ ho

ġhalat hai jazb-e-dil kā shikwa dekho jurm kis kā hai

na khīñcho gar tum apne ko kashākash darmiyāñ kyuñ ho

ye fitna aadmī kī ḳhāna-wīrānī ko kyā kam hai

hue tum dost jis ke dushman us kā āsmāñ kyuñ ho

yahī hai āzmānā to satānā kis ko kahte haiñ

adū ke ho liye jab tum to merā imtihāñ kyuñ ho

kahā tum ne ki kyuñ ho ġhair ke milne meñ ruswāī

bajā kahte ho sach kahte ho phir kahiyo ki hañ kyuñ ho

nikālā chāhtā hai kaam kyā tanoñ se tū 'ġhālib'

tere be-mehr kahne se wo tujh par mehrbāñ kyuñ ho