kisī ko de ke dil koī navā-sañj-e-fuġhāñ kyuuñ ho
na ho jab dil hī siine meñ to phir muñh meñ zabāñ kyuuñ ho
vo apnī ḳhū na chhoḌeñge ham apnī vaz' kyuuñ chhoḌeñ
subuk-sar ban ke kyā pūchheñ ki ham se sargirāñ kyuuñ ho
kiyā ġham-ḳhvār ne rusvā lage aag is mohabbat ko
na laave taab jo ġham kī vo merā rāz-dāñ kyuuñ ho
vafā kaisī kahāñ kā 'ishq jab sar phoḌnā Thahrā
to phir ai sañg-dil terā hī sañg-e-āstāñ kyuuñ ho
qafas meñ mujh se rūdād-e-chaman kahte na Dar hamdam
girī hai jis pe kal bijlī vo merā āshiyāñ kyuuñ ho
ye kah sakte ho ham dil meñ nahīñ haiñ par ye batlāo
ki jab dil meñ tumhīñ tum ho to āñkhoñ se nihāñ kyuuñ ho
ġhalat hai jazb-e-dil kā shikva dekho jurm kis kā hai
na khīñcho gar tum apne ko kashākash darmiyāñ kyuuñ ho
ye fitna aadmī kī ḳhāna-vīrānī ko kyā kam hai
hue tum dost jis ke dushman us kā āsmāñ kyuuñ ho
yahī hai āzmānā to satāna kis ko kahte haiñ
'adū ke ho liye jab tum to merā imtihāñ kyuuñ ho
kahā tum ne ki kyuuñ ho ġhair ke milne meñ rusvā.ī
bajā kahte ho sach kahte ho phir kahiyo ki haañ kyuuñ ho
nikālā chāhtā hai kaam kyā tā'noñ se tū 'ġhālib'
tire be-mehr kahne se vo tujh par mehrbāñ kyuuñ ho
kisi ko de ke dil koi nawa-sanj-e-fughan kyun ho
na ho jab dil hi sine mein to phir munh mein zaban kyun ho
wo apni KHu na chhoDenge hum apni waz' kyun chhoDen
subuk-sar ban ke kya puchhen ki hum se sargiran kyun ho
kiya gham-KHwar ne ruswa lage aag is mohabbat ko
na lawe tab jo gham ki wo mera raaz-dan kyun ho
wafa kaisi kahan ka 'ishq jab sar phoDna Thahra
to phir ai sang-dil tera hi sang-e-astan kyun ho
qafas mein mujh se rudad-e-chaman kahte na Dar hamdam
giri hai jis pe kal bijli wo mera aashiyan kyun ho
ye kah sakte ho hum dil mein nahin hain par ye batlao
ki jab dil mein tumhin tum ho to aankhon se nihan kyun ho
ghalat hai jazb-e-dil ka shikwa dekho jurm kis ka hai
na khincho gar tum apne ko kashakash darmiyan kyun ho
ye fitna aadmi ki KHana-virani ko kya kam hai
hue tum dost jis ke dushman us ka aasman kyun ho
yahi hai aazmana to satana kis ko kahte hain
'adu ke ho liye jab tum to mera imtihan kyun ho
kaha tum ne ki kyun ho ghair ke milne mein ruswai
baja kahte ho sach kahte ho phir kahiyo ki han kyun ho
nikala chahta hai kaam kya ta'non se tu 'ghaalib'
tere be-mehr kahne se wo tujh par mehrban kyun ho
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
