koi din gar zindagani aur hai

koī din gar zindagānī aur hai

apne jī meñ ham ne Thānī aur hai

ātish-e-dozaḳh meñ ye garmī kahāñ

soz-e-ġham-hā-e-nihānī aur hai

bār-hā dekhī haiñ un kī ranjisheñ

par kuchh ab ke sargirānī aur hai

de ke ḳhat muñh dekhtā hai nāma-bar

kuchh to paiġhām-e-zabānī aur hai

qāte’-e’mār hai aksar nujūm

vo balā-e-āsmānī aur hai

ho chukīñ 'ġhālib' balā.eñ sab tamām

ek marg-e-nā-gahānī aur hai

koi din gar zindagani aur hai

apne ji mein hum ne Thani aur hai

aatish-e-dozaKH mein ye garmi kahan

soz-e-gham-ha-e-nihani aur hai

bar-ha dekhi hain un ki ranjishen

par kuchh ab ke sargirani aur hai

de ke KHat munh dekhta hai nama-bar

kuchh to paigham-e-zabani aur hai

qate’-e’mar hai aksar nujum

wo bala-e-asmani aur hai

ho chukin 'ghaalib' balaen sab tamam

ek marg-e-na-gahani aur hai