koi ummid bar nahin aati

koī ummīd bar nahīñ aatī

koī sūrat nazar nahīñ aatī

maut kā ek din mu’ayyan hai

niiñd kyuuñ rāt-bhar nahīñ aatī

aage aatī thī hāl-e-dil pe hañsī

ab kisī baat par nahīñ aatī

jāntā huuñ savāb-e-tā’at-o-zohd

par tabī'at idhar nahīñ aatī

hai kuchh aisī hī baat jo chup huuñ

varna kyā baat kar nahīñ aatī

kyuuñ na chīḳhūñ ki yaad karte haiñ

merī āvāz gar nahīñ aatī

dāġh-e-dil gar nazar nahīñ aatā

bū bhī ai chāragar nahīñ aatī

ham vahāñ haiñ jahāñ se ham ko bhī

kuchh hamārī ḳhabar nahīñ aatī

marte haiñ aarzū meñ marne kī

maut aatī hai par nahīñ aatī

kā'ba kis muñh se jāoge 'ġhālib'

sharm tum ko magar nahīñ aatī

koi ummid bar nahin aati

koi surat nazar nahin aatī

maut ka ek din mu’ayyan hai

nind kyun raat-bhar nahin aatī

aage aati thi haal-e-dil pe hansi

ab kisi baat par nahin aati

jaanta hun sawab-e-ta’at-o-zohd

par tabi'at idhar nahin aati

hai kuchh aisi hi baat jo chup hun

warna kya baat kar nahin aati

kyun na chiKHun ki yaad karte hain

meri aawaz gar nahin aati

dagh-e-dil gar nazar nahin aata

bu bhi ai chaaragar nahin aati

hum wahan hain jahan se hum ko bhi

kuchh hamari KHabar nahin aati

marte hain aarzu mein marne ki

maut aati hai par nahin aati

ka'ba kis munh se jaoge 'ghaalib'

sharm tum ko magar nahin aati