kushāda dast-e-karam jab wo be-niyāz kare

kushāda dast-e-karam jab vo be-niyāz kare

niyāz-mand na kyuuñ ājizī pe naaz kare

biThā ke arsh pe rakkhā hai tū ne ai vaa.iz

ḳhudā vo kyā hai jo bandoñ se ehtirāz kare

mirī nigāh meñ vo riñd hī nahīñ saaqī

jo hoshiyārī o mastī meñ imtiyāz kare

mudām gosh-ba-dil rah ye saaz hai aisā

jo ho shikasta to paidā navā-e-rāz kare

koī ye pūchhe ki vaa.iz kā kyā bigaḌtā hai

jo be-amal pe bhī rahmat vo be-niyāz kare

suḳhan meñ soz ilāhī kahāñ se aatā hai

ye chiiz vo hai ki patthar ko bhī gudāz kare

tam.īz-e-lāla-o-gul se hai nāla-e-bulbul

jahāñ meñ vā na koī chashm-e-imtiyāz kare

ġhurūr-e-zohd ne sikhlā diyā hai vaa.iz ko

ki bandagān-e-ḳhudā par zabāñ darāz kare

havā ho aisī ki hindostāñ se ai 'iqbāl'

uḌā ke mujh ko ġhubār-e-rah-e-hijāz kare

kushāda dast-e-karam jab wo be-niyāz kare

niyāz-mand na kyuñ ājizī pe naz kare

biThā ke arsh pe rakkhā hai tū ne ai waiz

ḳhudā wo kyā hai jo bandoñ se ehtirāz kare

mirī nigāh meñ wo riñd hī nahīñ saqī

jo hoshiyārī o mastī meñ imtiyāz kare

mudām gosh-ba-dil rah ye saz hai aisā

jo ho shikasta to paidā nawā-e-rāz kare

koī ye pūchhe ki waiz kā kyā bigaḌtā hai

jo be-amal pe bhī rahmat wo be-niyāz kare

suḳhan meñ soz ilāhī kahāñ se aatā hai

ye chiz wo hai ki patthar ko bhī gudāz kare

tamīz-e-lāla-o-gul se hai nāla-e-bulbul

jahāñ meñ wā na koī chashm-e-imtiyāz kare

ġhurūr-e-zohd ne sikhlā diyā hai waiz ko

ki bandagān-e-ḳhudā par zabāñ darāz kare

hawā ho aisī ki hindostāñ se ai 'iqbāl'

uḌā ke mujh ko ġhubār-e-rah-e-hijāz kare