kyun jal gaya na tab-e-ruKH-e-yar dekh kar

kyuuñ jal gayā na tāb-e-ruḳh-e-yār dekh kar

jaltā huuñ apnī tāqat-e-dīdār dekh kar

ātish-parast kahte haiñ ahl-e-jahāñ mujhe

sargarm-e-nāla-hā-e-sharar-bār dekh kar

kyā ābrū-e-’ishq jahāñ 'aam ho jafā

ruktā huuñ tum ko be-sabab āzār dekh kar

aatā hai mere qatl ko par josh-e-rashk se

martā huuñ us ke haath meñ talvār dekh kar

sābit huā hai gardan-e-mīnā pe ḳhūn-e-ḳhalq

larze hai mauj-e-mai tirī raftār dekh kar

vā-hasratā ki yaar ne khīñchā sitam se haath

ham ko harīs-e-lazzat-e-āzār dekh kar

bik jaate haiñ ham aap matā’-e-suḳhan ke saath

lekin ’ayār-e-tab'a-e-ḳharīdār dekh kar

zunnār bāñdh sub.ha-e-sad-dāna toḌ Daal

rah-rau chale hai raah ko hamvār dekh kar

in ābloñ se paañv ke ghabrā gayā thā maiñ

jī ḳhush huā hai raah ko pur-ḳhār dekh kar

kyā bad-gumāñ hai mujh se ki ā.īne meñ mire

tuutī kā 'aks samjhe hai zangār dekh kar

girnī thī ham pe barq-e-tajallī na tuur par

dete haiñ baada zarf-e-qadah-ḳhvār dekh kar

sar phoḌnā vo 'ġhālib'-e-shorīda haal kā

yaad aa gayā mujhe tirī dīvār dekh kar

kyun jal gaya na tab-e-ruKH-e-yar dekh kar

jalta hun apni taqat-e-didar dekh kar

aatish-parast kahte hain ahl-e-jahan mujhe

sargarm-e-nala-ha-e-sharar-bar dekh kar

kya aabru-e-’ishq jahan 'am ho jafa

rukta hun tum ko be-sabab aazar dekh kar

aata hai mere qatl ko par josh-e-rashk se

marta hun us ke hath mein talwar dekh kar

sabit hua hai gardan-e-mina pe KHun-e-KHalq

larze hai mauj-e-mai teri raftar dekh kar

wa-hasrata ki yar ne khincha sitam se hath

hum ko haris-e-lazzat-e-azar dekh kar

bik jate hain hum aap mata’-e-suKHan ke sath

lekin ’ayar-e-tab'a-e-KHaridar dekh kar

zunnar bandh subha-e-sad-dana toD Dal

rah-rau chale hai rah ko hamwar dekh kar

in aablon se panw ke ghabra gaya tha main

ji KHush hua hai rah ko pur-KHar dekh kar

kya bad-guman hai mujh se ki aaine mein mere

tuti ka 'aks samjhe hai zangar dekh kar

girni thi hum pe barq-e-tajalli na tur par

dete hain baada zarf-e-qadah-KHwar dekh kar

sar phoDna wo 'ghaalib'-e-shorida haal ka

yaad aa gaya mujhe teri diwar dekh kar