le chala jaan meri ruTh ke jaana tera

le chalā jaan mirī ruuTh ke jaanā terā

aise aane se to behtar thā na aanā terā

apne dil ko bhī batā.ūñ na Thikānā terā

sab ne jaanā jo patā ek ne jaanā terā

tū jo ai zulf pareshān rahā kartī hai

kis ke ujḌe hue dil meñ hai Thikānā terā

aarzū hī na rahī sub.h-e-vatan kī mujh ko

shām-e-ġhurbat hai ajab vaqt suhānā terā

ye samajh kar tujhe ai maut lagā rakkhā hai

kaam aatā hai bure vaqt meñ aanā terā

ai dil-e-shefta meñ aag lagāne vaale

rañg laayā hai ye lākhe kā jamānā terā

tū ḳhudā to nahīñ ai nāseh-e-nādāñ merā

kyā ḳhatā kī jo kahā maiñ ne na maanā terā

ranj kyā vasl-e-adū kā jo ta.alluq hī nahīñ

mujh ko vallāh hañsātā hai rulānā terā

ka.aba o dair meñ yā chashm-o-dil-e-āshiq meñ

inhīñ do-chār gharoñ meñ hai Thikānā terā

tark-e-ādat se mujhe niind nahīñ aane kī

kahīñ nīchā na ho ai gor sirhānā terā

maiñ jo kahtā huuñ uThā.e haiñ bahut ranj-e-firāq

vo ye kahte haiñ baḌā dil hai tavānā terā

bazm-e-dushman se tujhe kaun uThā saktā hai

ik qayāmat kā uThānā hai uThānā terā

apnī āñkhoñ meñ abhī kauñd ga.ī bijlī sī

ham na samjhe ki ye aanā hai ki jaanā terā

yuuñ to kyā aa.egā tū fart-e-nazākat se yahāñ

saḳht dushvār hai dhoke meñ bhī aanā terā

'dāġh' ko yuuñ vo miTāte haiñ ye farmāte haiñ

tū badal Daal huā naam purānā terā

le chala jaan meri ruTh ke jaana tera

aise aane se to behtar tha na aana tera

apne dil ko bhi bataun na Thikana tera

sab ne jaana jo pata ek ne jaana tera

tu jo ai zulf pareshan raha karti hai

kis ke ujDe hue dil mein hai Thikana tera

aarzu hi na rahi subh-e-watan ki mujh ko

sham-e-ghurbat hai ajab waqt suhana tera

ye samajh kar tujhe ai maut laga rakkha hai

kaam aata hai bure waqt mein aana tera

ai dil-e-shefta mein aag lagane wale

rang laya hai ye lakhe ka jamana tera

tu KHuda to nahin ai naseh-e-nadan mera

kya KHata ki jo kaha main ne na mana tera

ranj kya wasl-e-adu ka jo talluq hi nahin

mujh ko wallah hansata hai rulana tera

kaba o dair mein ya chashm-o-dil-e-ashiq mein

inhin do-chaar gharon mein hai Thikana tera

tark-e-adat se mujhe nind nahin aane ki

kahin nicha na ho ai gor sirhana tera

main jo kahta hun uThae hain bahut ranj-e-firaq

wo ye kahte hain baDa dil hai tawana tera

bazm-e-dushman se tujhe kaun uTha sakta hai

ek qayamat ka uThana hai uThana tera

apni aankhon mein abhi kaund gai bijli si

hum na samjhe ki ye aana hai ki jaana tera

yun to kya aaega tu fart-e-nazakat se yahan

saKHt dushwar hai dhoke mein bhi aana tera

'dagh' ko yun wo miTate hain ye farmate hain

tu badal Dal hua nam purana tera