hum tujhse kis hawas ki falak justuju karen

ham tujh se kis havas kī falak justujū kareñ

dil hī nahīñ rahā hai ki kuchh aarzū kareñ

miT jaa.eñ ek aan meñ kasrat-numā.iyāñ

ham aa.ine ke sāmne jab aa ke hū kareñ

tar-dāmanī pe shaiḳh hamārī na jā.iyo

dāman nichoḌ deñ to farishte vuzū kareñ

sar-tā-qadam zabān hiiñ joñ shama' gu keh ham

par ye kahāñ majāl jo kuchh guftugū kareñ

har-chand aa.ina huuñ par itnā huuñ nā-qubūl

muñh pher le vo jis ke mujhe rū-ba-rū kareñ

ne gul ko hai sabāt na ham ko hai e'tibār

kis baat par chaman havas-e-rañg-o-bū kareñ

hai apnī ye salāh ki sab zāhidān-e-shahr

ai 'dard' aa ke bai'at dast-e-subū kareñ

hum tujh se kis hawas ki falak justuju karen

dil hi nahin raha hai ki kuchh aarzu karen

miT jaen ek aan mein kasrat-numaiyan

hum aaine ke samne jab aa ke hu karen

tar-damani pe shaiKH hamari na jaiyo

daman nichoD den to farishte wuzu karen

sar-ta-qadam zaban hin jon shama' gu keh hum

par ye kahan majal jo kuchh guftugu karen

har-chand aaina hun par itna hun na-qubul

munh pher le wo jis ke mujhe ru-ba-ru karen

ne gul ko hai sabaat na hum ko hai e'tibar

kis baat par chaman hawas-e-rang-o-bu karen

hai apni ye salah ki sab zahidan-e-shahr

ai 'dard' aa ke bai'at dast-e-subu karen