apni hasti ka jo hasil kahin irfan hojaye

apnī hastī kā jo hāsil kahīñ irfāñ hojāye

har haqīqat dil-e-insāñ pe numāyāñ hojāye

terā bīmār agar chhoḌ de dāmān-e-shakeb

aaj shīrāza-e-kaunain pareshāñ hojāye

kuchh to hojāye tire zauq-e-jafā kī takmīl

jism kā jism mohabbat meñ rag-e-jāñ hojāye

zabt-e-ulfat meñ hai īmān magar kyā kījiye

jo mere dil meñ hai āñkhoñ se numāyāñ hojāye

āñkhoñ āñkhoñ meñ pilā de mujhe sahbā-e-visāl

parde parde meñ ilāj-e-ġham-e-pinhāñ hojāye

ham bhī īmān kī daulat ko liye baiThe haiñ

is taraf bhī koī ġhārat-gar-e-īmāñ hojāye

bhed khul jaa.e baqā kā jo kahīñ ai 'māhir'

aadmī maut pe sau jaan se qurbāñ hojāye

apni hasti ka jo hasil kahin irfan hojaye

har haqiqat dil-e-insan pe numayan hojaye

tera bimar agar chhoD de daman-e-shakeb

aaj shiraaza-e-kaunain pareshan hojaye

kuchh to hojaye tere zauq-e-jafa ki takmil

jism ka jism mohabbat mein rag-e-jaan hojaye

zabt-e-ulfat mein hai iman magar kya kijiye

jo mere dil mein hai aankhon se numayan hojaye

aankhon aankhon mein pila de mujhe sahba-e-visal

parde parde mein ilaj-e-gham-e-pinhan hojaye

hum bhi iman ki daulat ko liye baiThe haiñ

is taraf bhi koi ghaarat-gar-e-iman hojaye

bhed khul jae baqa ka jo kahin ai 'mahir'

aadmi maut pe sau jaan se qurban hojaye