wo hans hans ke wade kae ja rahe hain

vo hañs hañs ke va.ade ka.e jā rahe haiñ

fareb-e-tamannā diye jā rahe haiñ

tirā naam lekar jiye jā rahe haiñ

gunāh-e-mohabbat kiye jā rahe haiñ

mire zaḳhm-e-dil kā muqaddar to dekho

nigāhoñ se Tāñke diye jā rahe haiñ

nahīñ dil meñ baaqī sakat zabt-e-ġham kī

magar āñsuoñ ko piye jā rahe haiñ

mire shaqq-e-dīdār kā haal sun kar

qiyāmat ke va.ade ka.e jā rahe haiñ

dhaḌakte hue dil ke parde meñ chhup kar

payām mohabbat diye jā rahe haiñ

harīm-e-tajallī meñ zauq-e-nazar hai

nigāhoñ se sajde kiye jā rahe haiñ

na kaalī ghaTā.eñ na phūloñ kā mausam

magar piine vaale piye jā rahe haiñ

tirī mahfil-e-nāz se uThne vaale

nigāhoñ meñ tujh ko liye jā rahe haiñ

abhī hai asīrī kā āġhāz 'māhir'

abhī to faqat par siye jā rahe haiñ

wo hans hans ke wade kae ja rahe hain

fareb-e-tamanna diye ja rahe hain

tera nam lekar jiye ja rahe hain

gunah-e-mohabbat kiye ja rahe hain

mere zaKHm-e-dil ka muqaddar to dekho

nigahon se Tanke diye ja rahe hain

nahin dil mein baqi sakat zabt-e-gham ki

magar aansuon ko piye ja rahe hain

mere shaqq-e-didar ka haal sun kar

qiyamat ke wade kae ja rahe hain

dhaDakte hue dil ke parde mein chhup kar

payam mohabbat diye ja rahe hain

harim-e-tajalli mein zauq-e-nazar hai

nigahon se sajde kiye ja rahe hain

na kali ghaTaen na phulon ka mausam

magar pine wale piye ja rahe hain

teri mahfil-e-naz se uThne wale

nigahon mein tujh ko liye ja rahe hain

abhi hai asiri ka aaghaz 'mahir'

abhi to faqat par siye ja rahe hain