mahram nahin hai tu hi nawa-ha-e-raaz ka

mahram nahīñ hai tū hī navā-hā-e-rāz kā

yaañ varna jo hijāb hai parda hai saaz kā

rañg-e-shikasta sub.h-e-bahār-e-nazāra hai

ye vaqt hai shaguftan-e-gul-hā-e-nāz kā

tū aur sū-e-ġhair nazar-hā-e-tez tez

maiñ aur dukh tirī mizha-hā-e-darāz kā

sarfa hai zabt-e-āh meñ merā vagarna maiñ

to'ma huuñ ek hī nafas-e-jāñ-gudāz kā

haiñ bas-ki josh-e-bāda se shīshe uchchhal rahe

har gosha-e-bisāt hai sar shīsha-bāz kā

kāvish kā dil kare hai taqāzā ki hai hunūz

nāḳhun pe qarz is girah-e-nīm-bāz kā

tārāj-e-kāvish-e-ġham-e-hijrāñ huā 'asad'

siina ki thā dafīna gohar-hā-e-rāz kā

mahram nahin hai tu hi nawa-ha-e-raaz ka

yan warna jo hijab hai parda hai saz ka

rang-e-shikasta subh-e-bahaar-e-nazara hai

ye waqt hai shaguftan-e-gul-ha-e-naz ka

tu aur su-e-ghair nazar-ha-e-tez tez

main aur dukh teri mizha-ha-e-daraaz ka

sarfa hai zabt-e-ah mein mera wagarna main

to'ma hun ek hi nafas-e-jaan-gudaz ka

hain bas-ki josh-e-baada se shishe uchchhal rahe

har gosha-e-bisat hai sar shisha-baz ka

kawish ka dil kare hai taqaza ki hai hunuz

naKHun pe qarz is girah-e-nim-baz ka

taraj-e-kawish-e-gham-e-hijran hua 'asad'

sina ki tha dafina gohar-ha-e-raaz ka