main KHayal hun kisi aur ka mujhe sochta koi aur hai

maiñ ḳhayāl huuñ kisī aur kā mujhe sochtā koī aur hai

sar-e-ā.īna mirā 'aks hai pas-e-ā.īna koī aur hai

maiñ kisī ke dast-e-talab meñ huuñ to kisī ke harf-e-du'ā meñ huuñ

maiñ nasīb huuñ kisī aur kā mujhe māñgtā koī aur hai

'ajab e'tibār-o-be-e'tibārī ke darmiyān hai zindagī

maiñ qarīb huuñ kisī aur ke mujhe jāntā koī aur hai

mirī raushnī tire ḳhadd-o-ḳhāl se muḳhtalif to nahīñ magar

tū qarīb aa tujhe dekh luuñ tū vahī hai yā koī aur hai

tujhe dushmanoñ kī ḳhabar na thī mujhe dostoñ kā patā nahīñ

tirī dāstāñ koī aur thī mirā vāqi.a koī aur hai

vahī munsifoñ kī rivāyateñ vahī faisloñ kī ’ibārateñ

mirā jurm to koī aur thā pe mirī sazā koī aur hai

kabhī lauT aa.eñ to pūchhnā nahīñ dekhnā unheñ ġhaur se

jinheñ rāste meñ ḳhabar huī ki ye rāsta koī aur hai

jo mirī riyāzat-e-nīm-shab ko 'salīm' sub.h na mil sakī

to phir is ke ma.anī to ye hue ki yahāñ ḳhudā koī aur hai

main KHayal hun kisi aur ka mujhe sochta koi aur hai

sar-e-aina mera 'aks hai pas-e-aina koi aur hai

main kisi ke dast-e-talab mein hun to kisi ke harf-e-du'a mein hun

main nasib hun kisi aur ka mujhe mangta koi aur hai

'ajab e'tibar-o-be-e'tibari ke darmiyan hai zindagi

main qarib hun kisi aur ke mujhe jaanta koi aur hai

meri raushni tere KHadd-o-KHal se muKHtalif to nahin magar

tu qarib aa tujhe dekh lun tu wahi hai ya koi aur hai

tujhe dushmanon ki KHabar na thi mujhe doston ka pata nahin

teri dastan koi aur thi mera waqia koi aur hai

wahi munsifon ki riwayaten wahi faislon ki ’ibaraten

mera jurm to koi aur tha pe meri saza koi aur hai

kabhi lauT aaen to puchhna nahin dekhna unhen ghaur se

jinhen raste mein KHabar hui ki ye rasta koi aur hai

jo meri riyazat-e-nim-shab ko 'salim' subh na mil saki

to phir is ke mani to ye hue ki yahan KHuda koi aur hai