main nara-e-mastana main shoKHi-e-rindana

maiñ na.ara-e-mastāna maiñ shoḳhī-e-rindāna

maiñ tishna kahāñ jā۔ūñ pī kar bhī kahāñ jaanā

maiñ tā.ir-e-lāhūtī maiñ jauhar-e-malakūtī

nāsūtī ne kab mujh ko is haal meñ pahchānā

maiñ soz-e-mohabbat huuñ maiñ ek qayāmat huuñ

maiñ ashk-e-nadāmat huuñ maiñ gauhar-e-yak-dāna

kis yaad kā sahrā huuñ kis chashm kā dariyā huuñ

ḳhud tuur kā jalva huuñ hai shakl-e-kalīmāna

maiñ sham-e-farozāñ huuñ maiñ ātish-e-larzāñ huuñ

maiñ sozish-e-hijrāñ huuñ maiñ manzil-e-parvāna

maiñ husn-e-mujassam huuñ maiñ gesū-e-barham huuñ

maiñ phuul huuñ shabnam huuñ maiñ jalva-e-jānāna

maiñ 'vāsif'-e-bismil huuñ maiñ raunaq-e-mahfil huuñ

ik TuuTā huā dil huuñ maiñ shahr meñ vīrāna

main nara-e-mastana main shoKHi-e-rindana

main tishna kahan ja۔un pi kar bhi kahan jaana

main tair-e-lahuti main jauhar-e-malakuti

nasuti ne kab mujh ko is haal mein pahchana

main soz-e-mohabbat hun main ek qayamat hun

main ashk-e-nadamat hun main gauhar-e-yak-dana

kis yaad ka sahra hun kis chashm ka dariya hun

KHud tur ka jalwa hun hai shakl-e-kalimana

main sham-e-farozan hun main aatish-e-larzan hun

main sozish-e-hijran hun main manzil-e-parwana

main husn-e-mujassam hun main gesu-e-barham hun

main phul hun shabnam hun main jalwa-e-jaanana

main 'wasif'-e-bismil hun main raunaq-e-mahfil hun

ek TuTa hua dil hun main shahr mein virana