miltī hai ḳhū-e-yār se nar iltihāb meñ

miltī hai ḳhū-e-yār se naar iltihāb meñ

kāfir huuñ gar na miltī ho rāhat azaab meñ

kab se huuñ kyā batā.ūñ jahān-e-ḳharāb meñ

shab-hā-e-hijr ko bhī rakhūñ gar hisāb meñ

tā phir na intizār meñ niiñd aa.e umr bhar

aane kā ahd kar ga.e aa.e jo ḳhvāb meñ

qāsid ke aate aate ḳhat ik aur likh rakhūñ

maiñ jāntā huuñ jo vo likheñge javāb meñ

mujh tak kab un kī bazm meñ aatā thā daur-e-jām

saaqī ne kuchh milā na diyā ho sharāb meñ

jo munkir-e-vafā ho fareb us pe kyā chale

kyuuñ bad-gumāñ huuñ dost se dushman ke baab meñ

maiñ muztarib huuñ vasl meñ ḳhauf-e-raqīb se

Daalā hai tum ko vahm ne kis pech-o-tāb meñ

maiñ aur hazz-e-vasl ḳhudā-sāz baat hai

jaañ nazr denī bhuul gayā iztirāb meñ

hai tevrī chaḌhī huī andar naqāb ke

hai ik shikan paḌī huī tarf-e-naqāb meñ

lākhoñ lagāo ek churānā nigāh kā

lākhoñ banāv ek bigaḌnā itaab meñ

vo naala dil meñ ḳhas ke barābar jagah na paa.e

jis naala se shigāf paḌe āftāb meñ

vo sehr mudd.ā-talabī meñ na kaam aa.e

jis sehr se safīna ravāñ ho sarāb meñ

'ġhālib' chhuTī sharāb par ab bhī kabhī kabhī

piitā huuñ roz-e-abr o shab-e-māhtāb meñ

miltī hai ḳhū-e-yār se nar iltihāb meñ

kāfir huñ gar na miltī ho rāhat azab meñ

kab se huñ kyā batāūñ jahān-e-ḳharāb meñ

shab-hā-e-hijr ko bhī rakhūñ gar hisāb meñ

tā phir na intizār meñ niñd aae umr bhar

aane kā ahd kar gae aae jo ḳhwāb meñ

qāsid ke aate aate ḳhat ek aur likh rakhūñ

maiñ jāntā huñ jo wo likheñge jawāb meñ

mujh tak kab un kī bazm meñ aatā thā daur-e-jām

saqī ne kuchh milā na diyā ho sharāb meñ

jo munkir-e-wafā ho fareb us pe kyā chale

kyuñ bad-gumāñ huñ dost se dushman ke bab meñ

maiñ muztarib huñ wasl meñ ḳhauf-e-raqīb se

Dalā hai tum ko wahm ne kis pech-o-tāb meñ

maiñ aur hazz-e-wasl ḳhudā-sāz baat hai

jañ nazr denī bhul gayā iztirāb meñ

hai tewrī chaḌhī huī andar naqāb ke

hai ek shikan paḌī huī tarf-e-naqāb meñ

lākhoñ lagāo ek churānā nigāh kā

lākhoñ banāw ek bigaḌnā itab meñ

wo nala dil meñ ḳhas ke barābar jagah na pae

jis nala se shigāf paḌe āftāb meñ

wo sehr muddā-talabī meñ na kaam aae

jis sehr se safīna rawāñ ho sarāb meñ

'ġhālib' chhuTī sharāb par ab bhī kabhī kabhī

pitā huñ roz-e-abr o shab-e-māhtāb meñ