kaba mein kya hai aur shiwale mein kya nahin

kā'ba meñ kyā hai aur shivāle meñ kyā nahīñ

pur-chashm-e-haq-shanās tujhe vā'izā nahīñ

haiñ mubtalā duī meñ ye sab zāhidān-e-shahr

un ahvaloñ ko ek kabhī sūjhtā nahīñ

kyā kufr hai muqīm jo ham dair meñ hue

vo kaun sā maqām hai jis meñ ḳhudā nahīñ

kyuuñ kar na samjhūñ bāda-parastī ko dīn-e-haq

maiñ rind-e-’ishq-bāz huuñ kuchh pārsā nahīñ

dā’vā liqā-e-yār kā dā’vā hai be-dalīl

sūrat se apne aap abhī āshnā nahīñ

taq.īd se jo maiñ su-e-itlāq aa gayā

dekhā jidhar vahī hai koī dosrā nahīñ

kī sair maiñ ne gulshan-e-ījād kī magar

hargiz nazar meñ rañg duī kā jamā nahīñ

mānind-e-sāya aaTh pahar sāth-sāth huuñ

qadmoñ se maiñ huzūr ke yak dam judā nahīñ

har har jihat meñ phirte haiñ badlā ke bhes ko

haiñ aap hī aap ġhair nahīñ hai sivā nahīñ

batlā.ūñgā ḳhudā kā patā kyā kisī ko maiñ

mā'lūm aaj tak mujhe merā patā nahīñ

vahdat kī sair rahtī hai kasrat meñ bhī hameñ

apnī nazar meñ tere sivā dosrā nahīñ

karte haiñ be-dahān-o-zabāñ guftugū vo 'faiz'

aisā kalām ham ne kisī kā sunā nahīñ

ka'ba mein kya hai aur shiwale mein kya nahin

pur-chashm-e-haq-shanas tujhe wa'iza nahin

hain mubtala dui mein ye sab zahidan-e-shahr

un ahwalon ko ek kabhi sujhta nahin

kya kufr hai muqim jo hum dair mein hue

wo kaun sa maqam hai jis mein KHuda nahin

kyun kar na samjhun baada-parasti ko din-e-haq

main rind-e-’ishq-baz hun kuchh parsa nahin

da’wa liqa-e-yar ka da’wa hai be-dalil

surat se apne aap abhi aashna nahin

taqid se jo main su-e-itlaq aa gaya

dekha jidhar wahi hai koi dosra nahin

ki sair main ne gulshan-e-ijad ki magar

hargiz nazar mein rang dui ka jama nahin

manind-e-saya aaTh pahar sath-sath hun

qadmon se main huzur ke yak dam juda nahin

har har jihat mein phirte hain badla ke bhes ko

hain aap hi aap ghair nahin hai siwa nahin

batlaunga KHuda ka pata kya kisi ko main

ma'lum aaj tak mujhe mera pata nahin

wahdat ki sair rahti hai kasrat mein bhi hamein

apni nazar mein tere siwa dosra nahin

karte hain be-dahan-o-zaban guftugu wo 'faiz'

aisa kalam hum ne kisi ka suna nahin