mera KHamosh rah kar bhi unhen sab kuchh suna dena

mirā ḳhāmosh rah kar bhī unheñ sab kuchh sunā denā

zabāñ se kuchh na kahnā dekh kar aañsū bahā denā

nasheman ho na ho ye to falak kā mashġhala Thahrā

ki do tinke jahāñ par dekhnā bijlī girā denā

maiñ is hālat se pahuñchā hashr vaale ḳhud pukār uTThe

koī fariyād vaalā aa rahā hai rāsta denā

ijāzat ho to kah duuñ qissa-e-ulfat sar-e-mahfil

mujhe kuchh to fasāna yaad hai kuchh tum sunā denā

maiñ mujrim huuñ mujhe iqrār hai jurm-e-mohabbat kā

magar pahle to ḳhat par ġhaur kar lo phir sazā denā

haTā kar ruḳh se gesū sub.h kar denā to mumkin hai

magar sarkār ke bas meñ nahīñ taare chhupā denā

ye tahzīb-e-chaman badlī hai bairūnī havāoñ ne

garebāñ-chāk phūloñ par kalī kā muskurā denā

'qamar' vo sab se chhup kar aa rahe haiñ fātiha paḌhne

kahūñ kis se ki merī sham-e-turbat ko bujhā denā

mera KHamosh rah kar bhi unhen sab kuchh suna dena

zaban se kuchh na kahna dekh kar aansu baha dena

nasheman ho na ho ye to falak ka mashghala Thahra

ki do tinke jahan par dekhna bijli gira dena

main is haalat se pahuncha hashr wale KHud pukar uTThe

koi fariyaad wala aa raha hai rasta dena

ijazat ho to kah dun qissa-e-ulfat sar-e-mahfil

mujhe kuchh to fasana yaad hai kuchh tum suna dena

main mujrim hun mujhe iqrar hai jurm-e-mohabbat ka

magar pahle to KHat par ghaur kar lo phir saza dena

haTa kar ruKH se gesu subh kar dena to mumkin hai

magar sarkar ke bas mein nahin tare chhupa dena

ye tahzib-e-chaman badli hai bairuni hawaon ne

gareban-chaak phulon par kali ka muskura dena

'qamar' wo sab se chhup kar aa rahe hain fatiha paDhne

kahun kis se ki meri sham-e-turbat ko bujha dena