kaisa tere maqtal mein tamasha nazar aaya

kaisā tere maqtal meñ tamāshā nazar aayā

gardan kaTī usī kī jo shaidā nazar aayā

sajda jo kiyā haar ke duniyā kī jafā se

aa.ī sadā āḳhir merā hī dar nazar aayā

hairat meñ huuñ kis baat kī hai mujh pe 'ināyat

mujhe kam-tar-o-bad-tar meñ tujhe kyā nazar aayā

kaise maiñ kahūñ ye ki tū nazroñ se chhupā hai

sab chhoḌ ga.e jab tū hī tanhā nazar aayā

tū rū-ba-rū ho kar bhī nigāhoñ se chhupā hai

tū ho ke 'ayāñ bhī pas-e-parda nazar aayā

guzrā jo tasavvur meñ terī rāh-e-fanā se

haidar kahīñ shabbīr-o-qalandar nazar aayā

tū merā bhī ḳhāliq hai mohammad kā bhī ḳhāliq

kaisā ye ḳhatā-kār ko rishta nazar aayā

tū laakh chhupe mujh se ai do-'ālam

har zarra terā parda uThātā nazar aayā

kaisa tere maqtal mein tamasha nazar aaya

gardan kaTi usi ki jo shaida nazar aaya

sajda jo kiya haar ke duniya ki jafa se

aai sada aaKHir mera hi dar nazar aaya

hairat mein hun kis baat ki hai mujh pe 'inayat

mujhe kam-tar-o-bad-tar mein tujhe kya nazar aaya

kaise main kahun ye ki tu nazron se chhupa hai

sab chhoD gae jab tu hi tanha nazar aaya

tu ru-ba-ru ho kar bhi nigahon se chhupa hai

tu ho ke 'ayan bhi pas-e-parda nazar aaya

guzra jo tasawwur mein teri rah-e-fana se

haidar kahin shabbir-o-qalandar nazar aaya

tu mera bhi KHaliq hai mohammad ka bhi KHaliq

kaisa ye KHata-kar ko rishta nazar aaya

tu lakh chhupe mujh se ai do-'alam

har zarra tera parda uThata nazar aaya