KHud parda mein chhup baiThe hain aur duniya ko hairani hai

ḳhud parda meñ chhup baiThe haiñ aur duniyā ko hairānī hai

haiñ chāroñ jānib DhūñDh rahe maḳhlūq huī dīvānī hai

aapas meñ sar Takrāte haiñ aur 'aql ke laTh haiñ kandhoñ par

andhoñ ne añdhere meñ mil kar yaañ ḳhaak bahut sī chhā.ī hai

haiñ millat-o-maz.hab jhagḌe haiñ aur dharm religion ragḌe haiñ

laḌvātā hai ḳhud sāroñ ko is jhagḌe kā ḳhud baanī hai

tasbīh kahīñ par hotī hai koī maalā le kar jiitā hai

sab us ke hijr meñ nālāñ haiñ aur vasl kī sab ne Thānī hai

koī masjid hai yā shivāla hai koī girjā hai yā mandir hai

har ek meñ qissa us kā hai har ik meñ is kī kahānī hai

har millat meñ har maz.hab meñ har majlis meñ har mahfil meñ

sab apnī hī us ko kahte haiñ vo sab kā pyārā jaanī hai

koī raam kahe koī parmeshvar koī goD kahe koī il-lallāh

tauhīd na maane muñh se kuufī par dil se sab ne maanī hai

sab sej pe us kī hāzir haiñ aur sab ko ghamanD piyā kā hai

koī sohnī bāñkī chhaplī hai koī luulī andhī kaanī hai

vo sāroñ kā an-dātā hai aur sab kā pālan haarā hai

koī 'ābid zāhid gyānī hai yā paapī fāsiq zaanī hai

ye sūraj chāñd sitāre sab maḳhlūq pe yaksāñ tābāñ haiñ

hai 'aam huā sāroñ ke liye aur 'aam hī us kā paanī hai

ham kū-e-butāñ meñ jaate haiñ aur Thokareñ vaañ kī khāte haiñ

anvār butoñ meñ us ke haiñ is vāste sar gardānī hai

yuuñ har ik aañkh se maḳhfī hai par har ik shai se zāhir hai

har chiiz meñ dekho nuur us kā is chiiz ko samjho faanī hai

ashlok paḌhe 'chishtī' ne ye ajmerī gur ke dvāre se

maqsūd vahī samjhe un kā jo 'ārif hai yā gyānī hai

KHud parda mein chhup baiThe hain aur duniya ko hairani hai

hain chaaron jaanib DhunDh rahe maKHluq hui diwani hai

aapas mein sar Takraate hain aur 'aql ke laTh hain kandhon par

andhon ne andhere mein mil kar yan KHak bahut si chhai hai

hain millat-o-mazhab jhagDe hain aur dharm religion ragDe hain

laDwata hai KHud saron ko is jhagDe ka KHud bani hai

tasbih kahin par hoti hai koi mala le kar jita hai

sab us ke hijr mein nalan hain aur wasl ki sab ne Thani hai

koi masjid hai ya shiwala hai koi girja hai ya mandir hai

har ek mein qissa us ka hai har ek mein is ki kahani hai

har millat mein har mazhab mein har majlis mein har mahfil mein

sab apni hi us ko kahte hain wo sab ka pyara jaani hai

koi ram kahe koi parmeshwar koi goD kahe koi il-lallah

tauhid na mane munh se kufi par dil se sab ne mani hai

sab sej pe us ki hazir hain aur sab ko ghamanD piya ka hai

koi sohni banki chhapli hai koi luli andhi kani hai

wo saron ka an-data hai aur sab ka palan haara hai

koi 'abid zahid gyani hai ya papi fasiq zani hai

ye suraj chand sitare sab maKHluq pe yaksan taban hain

hai 'am hua saron ke liye aur 'am hi us ka pani hai

hum ku-e-butan mein jate hain aur Thokaren wan ki khate hain

anwar buton mein us ke hain is waste sar gardani hai

yun har ek aankh se maKHfi hai par har ek shai se zahir hai

har chiz mein dekho nur us ka is chiz ko samjho fani hai

ashlok paDhe 'chishti' ne ye ajmeri gur ke dware se

maqsud wahi samjhe un ka jo 'arif hai ya gyani hai