na mere dil na jigar par na dida-e-tar par

na mere dil na jigar par na dīda-e-tar par

karam kare vo nishān-e-qadam to patthar par

tumhāre husn kī tasvīr koī kyā khīñche

nazar Thahartī nahīñ āriz-e-munavvar par

kisī ne lī rah-e-ka.aba koī gayā sū-e-dair

paḌe rahe tire bande magar tire dar par

gunāhgār huuñ maiñ vā.izo tumheñ kyā fikr

mirā muāmla chhoḌo shafī-e-mahshar par

un abaruoñ se kaho kushtanī meñ jaan bhī hai

usī ke vāste ḳhanjar khiñchā hai ḳhanjar par

pilā de aaj ki marte haiñ riñd ai saaqī

zarūr kyā ki ye jalsa ho hauz-e-kausar par

salāhiyat bhī to paidā kar ai dil-e-muztar

paḌā hai naqsh-e-kaf-e-pā-e-yār patthar par

vafūr-e-josh-e-ziyā aur un ke dāñtoñ kā

habāb-e-gumbad-e-gardūñ hai āb-e-gauhar par

aḳhīr vaqt hai 'āsī' chalo madīne ko

nisār ho ke maro turbat-e-payambar par

na mere dil na jigar par na dida-e-tar par

karam kare wo nishan-e-qadam to patthar par

tumhaare husn ki taswir koi kya khinche

nazar Thaharti nahin aariz-e-munawwar par

kisi ne li rah-e-kaba koi gaya su-e-dair

paDe rahe tere bande magar tere dar par

gunahgar hun main waizo tumhein kya fikr

mera muamla chhoDo shafi-e-mahshar par

un abaruon se kaho kushtani mein jaan bhi hai

usi ke waste KHanjar khincha hai KHanjar par

pila de aaj ki marte hain rind ai saqi

zarur kya ki ye jalsa ho hauz-e-kausar par

salahiyat bhi to paida kar ai dil-e-muztar

paDa hai naqsh-e-kaf-e-pa-e-yar patthar par

wafur-e-josh-e-ziya aur un ke danton ka

habab-e-gumbad-e-gardun hai aab-e-gauhar par

aKHir waqt hai 'asi' chalo madine ko

nisar ho ke maro turbat-e-payambar par