o sanam tere na aane ki qasam khata hun main

o sanam tere na aane kī qasam khātā huuñ maiñ

is dil-e-betāb ko din-rāt samjhātā huuñ maiñ

kaisī āñkheñ pher liiñ anjān kaise ban ga.e

dekh kar un kī taraf hairān ho jaatā huuñ maiñ

duur hote hote āḳhir duur itne ho ga.e

dil meñ rakh kar phir bhī un ko duur hī paatā huuñ maiñ

aap apnī aañkh se aakar kisī din dekh leñ

abr-e-naisāñ kī tarah barsāt barsātā huuñ maiñ

jab ki milne kī koī sūrat nazar aatī nahīñ

le ke phir tasvīr in kī dil ko bahlātā huuñ maiñ

kyā karūñ us ke sivā kuchh aur to hotā nahīñ

yaad jab aate haiñ vo aañsū bahā letā huuñ maiñ

vo gile-shikve ga.e vo pyaar kī bāteñ ga.iiñ

ab to un ko duur se hī dekhtā rahtā huuñ maiñ

rasm-e-ulfat toḌ kar qat-e'-ta'alluq kar liyā

aise logoñ se mohabbat kar ke pachhtātā huuñ maiñ

kyā kahūñ kis se kahūñ ab kaun suntā hai mirī

jis taraf bhī dekhtā huuñ ġhair hī paatā huuñ maiñ

kuchh to batlā de zarā āḳhir mu'amma hai ye kyā

sāmne aate haiñ vo bechain ho jaatā huuñ maiñ

is chaman kī har kalī har phuul har har rañg meñ

husn-e-mutlaq kā karishma dekhtā jaatā huuñ maiñ

yād-e-rafta dil meñ le ke us kī bazm-e-nāz meñ

dil dabā.e sar jhukā.e yuuñ chalā jaatā huuñ maiñ

ḳhuub hī achchhā kahā 'mushtāq' jis ne ye kahā

bevafā kahte haiñ tujh ko aur sharmātā huuñ maiñ

o sanam tere na aane ki qasam khata hun main

is dil-e-betab ko din-raat samjhata hun main

kaisi aankhen pher lin anjaan kaise ban gae

dekh kar un ki taraf hairan ho jata hun main

dur hote hote aaKHir dur itne ho gae

dil mein rakh kar phir bhi un ko dur hi pata hun main

aap apni aankh se aakar kisi din dekh len

abr-e-naisan ki tarah barsat barsata hun main

jab ki milne ki koi surat nazar aatī nahin

le ke phir taswir in ki dil ko bahlata hun main

kya karun us ke siwa kuchh aur to hota nahin

yaad jab aate hain wo aansu baha leta hun main

wo gile-shikwe gae wo pyar ki baaten gain

ab to un ko dur se hi dekhta rahta hun main

rasm-e-ulfat toD kar qat-e'-ta'alluq kar liya

aise logon se mohabbat kar ke pachhtata hun main

kya kahun kis se kahun ab kaun sunta hai meri

jis taraf bhi dekhta hun ghair hi pata hun main

kuchh to batla de zara aaKHir mu'amma hai ye kya

samne aate hain wo bechain ho jata hun main

is chaman ki har kali har phul har har rang mein

husn-e-mutlaq ka karishma dekhta jata hun main

yaad-e-rafta dil mein le ke us ki bazm-e-naz mein

dil dabae sar jhukae yun chala jata hun main

KHub hi achchha kaha 'mushtaq' jis ne ye kaha

bewafa kahte hain tujh ko aur sharmata hun main