phir kuchh ek dil ko be-qarari hai

phir kuchh ik dil ko be-qarārī hai

siina juyā-e-zaḳhm-e-kārī hai

phir jigar khodne lagā nāḳhun

āmad-e-fasl-e-lāla-kārī hai

qibala-e-maqsad-e-nigāh-e-niyāz

phir vahī parda-e-’amārī hai

chashm dallāl-e-jins-e-rusvā.ī

dil ḳharīdār-e-zauq-e-ḳhvārī hai

vahī sad-rañg nāla-farsā.ī

vahī sad-gūna ashk-bārī hai

dil havā-e-ḳhirām-e-nāz phir se phir

mahsharistān-e-be-qarārī hai

jalva phir ’arz-e-nāz kartā hai

roz bāzār-e-jāñ-sipārī hai

phir usī be-vafā pe marte haiñ

phir vahī zindagī hamārī hai

phir khulā hai dar-e-’adālat-e-nāz

garm-bāzār-e-faujdārī hai

ho rahā hai jahān meñ andher

zulf kī phir sirishta-dārī hai

phir diyā pāra-e-jigar ne svaal

ek fariyād-o-āh-o-zārī hai

phir hue haiñ gavāh-e-’ishq talab

ashk-bārī kā hukm jaarī hai

dil va mizhgāñ kā jo muqaddama thā

aaj phir us kī rū-bakārī hai

be-ḳhudī be-sabab nahīñ 'ġhālib'

kuchh to hai jis kī parda-dārī hai

phir kuchh ek dil ko be-qarari hai

sina juya-e-zaKHm-e-kari hai

phir jigar khodne laga naKHun

aamad-e-fasl-e-lala-kari hai

qibala-e-maqsad-e-nigah-e-niyaz

phir wahi parda-e-’amari hai

chashm dallal-e-jins-e-ruswai

dil KHaridar-e-zauq-e-KHwari hai

wahi sad-rang nala-farsai

wahi sad-guna ashk-bari hai

dil hawa-e-KHiram-e-naz phir se phir

mahsharistan-e-be-qarari hai

jalwa phir ’arz-e-naz karta hai

roz bazar-e-jaan-sipari hai

phir usi be-wafa pe marte hain

phir wahi zindagi hamari hai

phir khula hai dar-e-’adalat-e-naz

garm-bazar-e-faujdari hai

ho raha hai jahan mein andher

zulf ki phir sirishta-dari hai

phir diya para-e-jigar ne swal

ek fariyaad-o-ah-o-zari hai

phir hue hain gawah-e-’ishq talab

ashk-bari ka hukm jari hai

dil wa mizhgan ka jo muqaddama tha

aaj phir us ki ru-bakari hai

be-KHudi be-sabab nahin 'ghaalib'

kuchh to hai jis ki parda-dari hai