phir kuchh ek dil ko be-qarārī hai

phir kuchh ik dil ko be-qarārī hai

siina juyā-e-zaḳhm-e-kārī hai

phir jigar khodne lagā nāḳhun

āmad-e-fasl-e-lāla-kārī hai

qibala-e-maqsad-e-nigāh-e-niyāz

phir vahī parda-e-amārī hai

chashm dallāl-e-jins-e-rusvā.ī

dil ḳharīdār-e-zauq-e-ḳhvārī hai

vahī sad-rañg nāla-farsā.ī

vahī sad-gona ashk-bārī hai

dil havā-e-ḳhirām-e-nāz se phir

mahsharistān-e-be-qarārī hai

jalva phir arz-e-nāz kartā hai

roz bāzār-e-jāñ-sipārī hai

phir usī bevafā pe marte haiñ

phir vahī zindagī hamārī hai

phir khulā hai dar-e-adālat-e-nāz

garm-bāzār-e-faujdārī hai

ho rahā hai jahān meñ andher

zulf kī phir sirishta-dārī hai

phir diyā pāra-e-jigar ne savāl

ek fariyād o āh-o-zārī hai

phir hue haiñ gavāh-e-ishq talab

ashk-bārī kā hukm-jārī hai

dil o mizhgāñ kā jo muqaddama thā

aaj phir us kī rū-bakārī hai

be-ḳhudī be-sabab nahīñ 'ġhālib'

kuchh to hai jis kī parda-dārī hai

phir kuchh ek dil ko be-qarārī hai

sina juyā-e-zaḳhm-e-kārī hai

phir jigar khodne lagā nāḳhun

āmad-e-fasl-e-lāla-kārī hai

qibala-e-maqsad-e-nigāh-e-niyāz

phir wahī parda-e-amārī hai

chashm dallāl-e-jins-e-ruswāī

dil ḳharīdār-e-zauq-e-ḳhwārī hai

wahī sad-rañg nāla-farsāī

wahī sad-gona ashk-bārī hai

dil hawā-e-ḳhirām-e-nāz se phir

mahsharistān-e-be-qarārī hai

jalwa phir arz-e-nāz kartā hai

roz bāzār-e-jāñ-sipārī hai

phir usī bewafā pe marte haiñ

phir wahī zindagī hamārī hai

phir khulā hai dar-e-adālat-e-nāz

garm-bāzār-e-faujdārī hai

ho rahā hai jahān meñ andher

zulf kī phir sirishta-dārī hai

phir diyā pāra-e-jigar ne sawāl

ek fariyād o āh-o-zārī hai

phir hue haiñ gawāh-e-ishq talab

ashk-bārī kā hukm-jārī hai

dil o mizhgāñ kā jo muqaddama thā

aaj phir us kī rū-bakārī hai

be-ḳhudī be-sabab nahīñ 'ġhālib'

kuchh to hai jis kī parda-dārī hai