ye kaam humne junun mein kiya kiya na kiya

ye kaam ham ne junūñ meñ kiyā kiyā na kiyā

huā jo chaak garebāñ siyā siyā na siyā

vufūr-e-shauq meñ kyā e'tibār sāñsoñ kā

rahā rahā na rahā maiñ jiyā jiyā na jiyā

ham aate jaate rahe mai-kade meñ shām-o-sahar

sharīk-e-jām kisī ne kiyā kiyā na kiyā

piyāla haath meñ lenā hī mai-gusārī hai

balā se ghūñT jo ham ne piyā piyā na piyā

hamārā farz to ye hai ke ham gila na kareñ

sila vafāoñ kā us ne diyā diyā na diyā

tamām 'umr hasīnoñ ko TuuT kar chāhā

unhoñ ne naam hamārā liyā liyā na liyā

salām-e-shauq kiyā jab koī milā ham ko

javāb chāhe kisī ne diyā diyā na diyā

chale bhī aa.iye kal kā kuchh e'tibār nahīñ

marīz-e-hijr sahr tak jiyā jiyā na jiyā

ham apnī manzil-e-maqsūd kī lagan meñ rahe

hamārā saath kisī ne diyā diyā na diyā

ḳhudā gavāh mohabbat to kī vafā na sahī

ye ek zahr kā piyāla piyā piyā na piyā

'nasīr' ḳhair se ho jā.egī hayāt basar

kisī kā ham ne sahārā liyā liyā na liyā

ye kaam hum ne junun mein kiya kiya na kiya

hua jo chaak gareban siya siya na siya

wufur-e-shauq mein kya e'tibar sanson ka

raha raha na raha main jiya jiya na jiya

hum aate jate rahe mai-kade mein sham-o-sahar

sharik-e-jam kisi ne kiya kiya na kiya

piyala hath mein lena hi mai-gusari hai

bala se ghunT jo hum ne piya piya na piya

hamara farz to ye hai ke hum gila na karen

sila wafaon ka us ne diya diya na diya

tamam 'umr hasinon ko TuT kar chaha

unhon ne nam hamara liya liya na liya

salam-e-shauq kiya jab koi mila hum ko

jawab chahe kisi ne diya diya na diya

chale bhi aaiye kal ka kuchh e'tibar nahin

mariz-e-hijr sahr tak jiya jiya na jiya

hum apni manzil-e-maqsud ki lagan mein rahe

hamara sath kisi ne diya diya na diya

KHuda gawah mohabbat to ki wafa na sahi

ye ek zahr ka piyala piya piya na piya

'nasir' KHair se ho jaegi hayat basar

kisi ka hum ne sahaara liya liya na liya