ishq ka farz kuchh is tarh ada hota hai

'ishq kā farz kuchh is tarh adā hotā hai

har nafs mā'rka-e-karb-o-balā hotā hai

zāhidoñ kī ye namāzī bhī bajā haiñ lekin

sajda-e-'ishq tah-e-teġh adā hotā hai

merī taqsīr hai yā mere kamāñ vaale kī

nigah-e-nāz kā kyuuñ tiir ḳhatā hotā hai

apnī rasmoñ pe na kar shar’-e-mohabbat kā qiyās

dostī ke liye dastūr judā hotā hai

husn-e-mā’sūm meñ is terī karāmat ke nisār

lab pe jo naala pahuñchtā hai du'ā hotā hai

lāla-o-gul ke jigar chaak hue jaate haiñ

kaun gulshan meñ ye sargarm-e-navā hotā hai

apnī mahrūmī-e-qismat pe huuñ nāzāñ 'kausar'

dil-e-sad-pāra meñ kahte haiñ ḳhudā hotā hai

'ishq ka farz kuchh is tarh ada hota hai

har nafs ma'rka-e-karb-o-bala hota hai

zahidon ki ye namazi bhi baja hain lekin

sajda-e-'ishq tah-e-tegh ada hota hai

meri taqsir hai ya mere kaman wale ki

nigah-e-naz ka kyun tir KHata hota hai

apni rasmon pe na kar shar’-e-mohabbat ka qiyas

dosti ke liye dastur juda hota hai

husn-e-ma’sum mein is teri karamat ke nisar

lab pe jo nala pahunchta hai du'a hota hai

lala-o-gul ke jigar chaak hue jate hain

kaun gulshan mein ye sargarm-e-nawa hota hai

apni mahrumi-e-qismat pe hun nazan 'kausar'

dil-e-sad-para mein kahte hain KHuda hota hai