bhalai kar bhala hoga burai kar bura hoga

bhalā.ī kar bhalā hogā burā.ī kar burā hogā

koī dekhe na dekhe par ḳhudā to dekhtā hogā

ye gaThrī paap kī sar par liye phirtā hai kyuuñ nādāñ

bhalā.ī se tu muñh ko moḌ kar baiThā hai kyuuñ nādāñ

ye duniyā chaar din kī hai phir us ke baa'd kyā hogā

bhalā.ī kar bhalā hogā burā.ī kar burā hogā

abhī jitnā bhī jī chāhe lagā ke aag paanī meñ

ik aisā vaqt bhī aa.egā terī zindagānī meñ

na hogā koī terā bas usī kā aasrā hogā

bhalā.ī kar bhalā hogā burā.ī kar burā hogā

zarā daulat jo haath aa.ī to maġhrūr ban baiThā

dil-e-insāniyat ke vāste nāsūr ban baiThā

ḳhabar bhī hai tujhe ik roz terā ḳhātima hogā

bhalā.ī kar bhalā hogā burā.ī kar burā hogā

yahāñ se zindagānī terī ḳhālī haath jā.egī

faqat karnī tirī duniyā se tere saath jā.egī

vahāñ ke vāste bhī kuchh na kuchh to sochnā hogā

bhalā.ī kar bhalā hogā burā.ī kar burā hogā

ye añgāre na chun tū apnā dāman phuul se bhar ke

abhī baaqī hai kuchh din hāsil ke nekiyāñ kar ke

bahut pachhtā.egā ye vaqt bhī jab jā chukā hogā

bhalā.ī kar bhalā hogā burā.ī kar burā hogā

na 'izzat kaam aa.egī na shohrat aa.egī

na daulat kaam aa.egī na tāqat kaam aa.egī

are nādān sochā hai tirā anjām kyā hogā

bhalā.ī kar bhalā hogā burā.ī kar burā hogā

burā.ī bojh ban kar tere sar par aa paḌī hogī

tere dil kī siyāhī sāmne tere khaḌī hogī

tere bechārgī par terā saaya hañs rahā hogā

bhalā.ī kar bhalā hogā burā.ī kar burā hogā

javānī ke ye din ik roz tujh ko yaad ā.eñge

tere a'amāl tujh ko ḳhuun ke aañsū rulā.enge

akaḌ kar chalne vaale tū sahārā DhūñDhtā hogā

bhalā.ī kar bhalā hogā burā.ī kar burā hogā

na ham-dam aur na ye apne begāne saath jā.eñge

na duniyā aur na duniyā ke khzāne saath jā.eñge

mano miTTī ke nīche qabr meñ tū so rahā hogā

bhalā.ī kar bhalā hogā burā.ī kar burā hogā

duāoñ se agar dāman ko bhar letā to achchhā thā

kabhī is baat par bhī ġhaur kar letā to achchhā thā

tū āḳhir kyā karegā jab ḳhudā kā sāmnā hogā

bhalā.ī kar bhalā hogā burā.ī kar burā hogā

kabhī īmān se muñh moḌnā achchhā nahīñ hotā

ki insānoñ ke dil ko toḌnā achchhā nahīñ hotā

ye darpan TuuT jā.egā to mushkil joḌnā hogā

bhalā.ī kar bhalā hogā burā.ī kar burā hogā

musallat gulshan-e-hastī pe vīrānī nahīñ hogī

ḳhudā ke nek bandoñ ko pareshānī nahīñ hogī

ki un ke vāste jannat kā darvāza khulā hogā

bhalā.ī kar bhalā hogā burā.ī kar burā hogā

na hargiz tum kabhī mazlūm kī aahoñ se Takrānā

jahāñ tak ho sake ahl-e-zamīñ par rahm farmānā

ki haqq-e-ādamiyat yuuñ hī ai 'qaisar' adā hogā

bhalā.ī kar bhalā hogā burā.ī kar burā hogā

bhalai kar bhala hoga burai kar bura hoga

koi dekhe na dekhe par KHuda to dekhta hoga

ye gaThri pap ki sar par liye phirta hai kyun nadan

bhalai se tu munh ko moD kar baiTha hai kyun nadan

ye duniya chaar din ki hai phir us ke ba'd kya hoga

bhalai kar bhala hoga burai kar bura hoga

abhi jitna bhi ji chahe laga ke aag pani mein

ek aisa waqt bhi aaega teri zindagani mein

na hoga koi tera bas usi ka aasra hoga

bhalai kar bhala hoga burai kar bura hoga

zara daulat jo hath aai to maghrur ban baiTha

dil-e-insaniyat ke waste nasur ban baiTha

KHabar bhi hai tujhe ek roz tera KHatima hoga

bhalai kar bhala hoga burai kar bura hoga

yahan se zindagani teri KHali hath jaegi

faqat karni teri duniya se tere sath jaegi

wahan ke waste bhi kuchh na kuchh to sochna hoga

bhalai kar bhala hoga burai kar bura hoga

ye angare na chun tu apna daman phul se bhar ke

abhi baqi hai kuchh din hasil ke nekiyan kar ke

bahut pachhtaega ye waqt bhi jab ja chuka hoga

bhalai kar bhala hoga burai kar bura hoga

na 'izzat kaam aaegi na shohrat aaegi

na daulat kaam aaegi na taqat kaam aaegi

are nadan socha hai tera anjam kya hoga

bhalai kar bhala hoga burai kar bura hoga

burai bojh ban kar tere sar par aa paDi hogi

tere dil ki siyahi samne tere khaDi hogi

tere bechaargi par tera saya hans raha hoga

bhalai kar bhala hoga burai kar bura hoga

jawani ke ye din ek roz tujh ko yaad aaenge

tere a'amal tujh ko KHun ke aansu rulaenge

akaD kar chalne wale tu sahaara DhunDhta hoga

bhalai kar bhala hoga burai kar bura hoga

na ham-dam aur na ye apne begane sath jaenge

na duniya aur na duniya ke khzane sath jaenge

mano miTTi ke niche qabr mein tu so raha hoga

bhalai kar bhala hoga burai kar bura hoga

duaon se agar daman ko bhar leta to achchha tha

kabhi is baat par bhi ghaur kar leta to achchha tha

tu aaKHir kya karega jab KHuda ka samna hoga

bhalai kar bhala hoga burai kar bura hoga

kabhi iman se munh moDna achchha nahin hota

ki insanon ke dil ko toDna achchha nahin hota

ye darpan TuT jaega to mushkil joDna hoga

bhalai kar bhala hoga burai kar bura hoga

musallat gulshan-e-hasti pe virani nahin hogi

KHuda ke nek bandon ko pareshani nahin hogi

ki un ke waste jannat ka darwaza khula hoga

bhalai kar bhala hoga burai kar bura hoga

na hargiz tum kabhi mazlum ki aahon se Takrana

jahan tak ho sake ahl-e-zamin par rahm farmana

ki haqq-e-adamiyat yun hi ai 'qaisar' ada hoga

bhalai kar bhala hoga burai kar bura hoga