hai misr mein shohra teri shirin-dahni ka

hai misr meñ shohrā terī shīrīñ-dahnī kā

dam band laboñ se hai 'aqīq-e-yamanī kā

tū qasd karegā na mirī dil-shikanī kā

hai paas barābar tujhe muhtāj-o-ġhanī kā

tārāj kiyā kishvar-e-dil terī nigah ne

lapkā na sipāhī ko paḌe rāh-zanī kā

munsif ho agar dīda-e-insāf se dekhe

gul naam na le aage tire gul-badanī kā

khul jāvegā zuhhād pe rindoñ kā taqaddus

mausam to qarīb aane do tauba-shikanī kā

mizhgāñ tirī phir karne lagīñ ḳhuun diloñ kā

aañ turkoñ ko phir shauq huā ārā-zanī kā

yād-e-durr-e-dandāñ meñ ga.ī jaan mirī 'rind'

taqdīr ne kushta kiyā hiire kī kanī kā

hai misr mein shohra teri shirin-dahni ka

dam band labon se hai 'aqiq-e-yamani ka

tu qasd karega na meri dil-shikani ka

hai pas barabar tujhe muhtaj-o-ghani ka

taraj kiya kishwar-e-dil teri nigah ne

lapka na sipahi ko paDe rah-zani ka

munsif ho agar dida-e-insaf se dekhe

gul nam na le aage tere gul-badani ka

khul jawega zuhhad pe rindon ka taqaddus

mausam to qarib aane do tauba-shikani ka

mizhgan teri phir karne lagin KHun dilon ka

aan turkon ko phir shauq hua aara-zani ka

yaad-e-durr-e-dandan mein gai jaan meri 'rind'

taqdir ne kushta kiya hire ki kani ka